Ṱhalutshedzo nga: Khathutshelo Raliphaswa.
Naho vhunzhi ha vhathu vhane vha dzula kha zwisi zwa mahayani vha tshi khou ṱahelelwa nga ṱhoḓea dzine dza leludza matshilo a vhathu, sa izwi zwithu zwi tshi dzula zwi tshi shanduka nau khwinifhadzwa. Vhadzulapo vha kusi kwa Maṱangari vho ḓalelwa nga dakalo sa izwi Vhamusanda Vho-Mutulagole Nyamande vho rwela ṱari u pangwa ha inthanethe ya mahala ine ai valwi ine ya ḓo shumiswa nga nnyi-na-nnyi kha kusi uko.
Kha nyambedzano na vha gurannḓa ya Limpopo Mirror, Vho-Nyamande vho ṱalutshedza uri ndi tshini tshovha takusaho uri vhathuse vhalanda vhavho inthanethe. Vhari: "Ndori zwezwi ndi tshi khou tshimbila kha kusi kwanga nda ṱangana na mualuwa. Ngau vhilaela nau ṱoḓa u ḓivha uri ndi ngani vha tshi khou tshimbila vhusiku, nda vha vhuzisa uri vhaya ngafhi sa izwi ḓuvha ḽo kovhela, vhari vha khou ṱoḓa u rengela muḓulu wavho ethaimi uri a kone u ṅwala mushumo wa tshikolo. Zwo mbaisa u pfa maipfi ayo, hone zwihulu ndi tshi vhona uri vha khou shumisa masheleni a gavhelo ḽavho. Vhusiku uvho, nda zwi vhona uri huna zwinzhi zwine ndi tea u itela vhadzulapo."
Vho-Nyamande vhari u bva afho, lwa maḓuvha mararu a tevhelaho, vho tshimbila na ḓorobo ya Ṱhohoyadou na Tshitandani, na khoro yavho vha tshi ṱoḓa vhane vha ḓovha nea tshumelo ya mahala ya u swikelela inthanethe. "Naho zwo konḓa uri vhunzhi havho vha nea murahu kha tshitshavha, rovha na mashudu vha tshumelo ya Letaba Networks vha tshi pfa tshililo tshashu. Hei i touvha ḓivhazwakale ye ra itela vhathu vha kusi kwashu ine ya ḓo vha thusa u wana thuso ngau ṱavhanya, ya dovha hafhu ya thusa vhagudiswa kha mishumo yavho ya tshikolo nga nḓila yo leluwaho," vha zwa.
Vhari vha Letaba Networks vho vha nea thawara tharu kha vhupo ho fhambana kha kusi kwavho. "Sa izwi huna thawara tharu dzine dza khou shuma zwa zwino, ri ḓo engedza mbili uri vhathu vhashu vha si tshimbile lwendo lu lapfu vha tshi ṱoḓa tshumelo."
Munwe wa vhadzulapo vha Maṱangari, Vho-Emmanuel Manyuha, vho livhuwa Vhamusanda na khoro yavho, na vha Letaba Networks kha uvha nea tshumelo iyi. "Zwa zwino ria swikelela epe ifhio na ifhio nga mahala, ri sa vhilaeli nga u ḓura ha ethaimi," vha amba.