Tshiṱori nga vha Develoment. Ṱhalutshedzo nga: Khathutshelo Raliphaswa.
Vho-Rosina Thabi vhane vhavha mudzulapo wa Maṱangari vhari vhovha vha tshi tshimbila khilomitha dzi swikaho dza fumi vha tshi ya mulamboni wa Mudaswali vha tshi tevhela maḓi. Kha lwendo ulwo lwau tevhela maḓi, vhovha vha tshi vhea vhutshilo havho khomboni yau thulwa nga mimoḓoro sa izwi vhovha vha tshi shumisa gondo line ḽa shumiseswa nga mimoḓoro, fhedzi iyi hovha hu yone nḓila yau wana maḓi kha vhathu vha kusi uku sa izwi maḓi a ṱhoḓea ya ḓuvha ḽinwe na ḽinwe.
Nḓila iyi yau wana maḓi kha vhadzulapo vha Maṱangari yovha ḓivhazwakale vha tshi vhorelwa maḓi nga vha Innovation Africa. Tshumelo iyi yo sia vhadzulapo vho ḓalewa nga dakalo sa izwi zwa zwino vha tshi kona u wana maḓi tshifhinga tshoṱhe tsini na miḓi yavho.
Vhamusanda vha Maṱangari Vho-Mutulagole Nyamande, vho sumbedzisa uri u vhorwa ha maḓi zwo ḓisa tshanduko kha matshilo a vhadzulapo vha Maṱangari.
"U mona na shango, vhathu vha vhilaela nga tshumelo ya maḓi, hone zwovha zwi tshi kwama vhadzulapo vha kusi kwanga nga nḓila isi yavhuḓi. Ndo fanela u thusa vhadzulapo vhanga uri vha kone u wana maḓi sa izwi vhadzulapo vha tshi ṱangana na dzi khaedu dzau wana maḓi ḓuvha na ḓuvha, hone vhanzhi vha sa swikeleli uḓi vhorela maḓi miḓini yavho. Ndo isa khumbelo yau ḓiselwa maḓi kusini kwashu kha vhoramabindu, naho zwovha zwi songo leluwa," vha zwa.
Vhamusanda vhari vho takala vhukuma uri hovha navhe vha vha lambedza, vha Innovation Africa, vhevha ṱanganedza khumbelo yavho vha vha thusa. "Vho ri thusa nga tshihaḓu hone ro takala vhukuma uri vhathu vhaa kona u wana maḓi nga tshifhinga tshine vha ṱoḓa. Themamveledziso iyi yo thoma ṅwaha wo fhelaho nga Ṱhangule, vha fhedza nga Luhuhi ṅwaha-uno. Vha ṱoḓa u engedza milindi mivhili yau vhorwa kha kusi kwa Buluni na kwa Dzumbama, huu itela uri vhadzulapo vha kone u wana maḓi tsini na miḓi yavho," vha zwa.
Munwe wa vhadzulapo vho takalaho nga tshumelo iyi, Vho-Rofhiwa Begwa, vhari a vhana maipfi au ṱalusa nga nḓila ine vha livhuwa Vhamusanda Vho-Nyamande ngayo na vhalambedzi vha tshumelo iyi. "U wana maḓi tsini na miḓi yashu zwo ri leludzela matshilo ashu. Ria livhuwa Vhamusanda Vho-Nyamande na vha Innovation Africa," vha amba.