Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Vhadzulapo vho sinyuwaho vha bvaho Musina kha Wadi 9, hu tshi katelwa vhupo ha Matshena, Mapakoni, Mataulu, Makavhe, Bale, Rangani Sigonde, Tuwani na Hagumbu, vho matsha vha tshi ya ofisini dza Khoro ya Mvelele ya Manenzhe nga Ḽavhuṱanu ḽa vhege yo fhiraho ya ḽa fumi-raru Fulwi, u itela u ṋetshedza memorandamu wa ṱhoḓea na mbilaelo dzavho.
Zwibammbiri zwa u fhaṱa zwibammbiri, gogo ḽihulwane ḽo ita nḓila ya u ya ofisini, he memorandamu wa ṋewa vhaofisiri vha bvaho kha Muhasho wa Vhuvhusi ha Tshumisano, Madzulo a Vhathu na Mafhungo a Mvelele, vhe vha fulufhedzisa u i fhirisela kha vhavhusi vhahulwane.
Vhunzhi ha u dinalea hu vhonala hu tshi khou sendeka kha murangaphanḓa muhulwane wa sialala, Thovhele Vho Takalani Elon Manenzhe, vhevha vha vhe siho musi memorandamu u tshi swikiswa. Vhagwalabi vha khou vha pomoka uri vha khou vhusa nga nḓila i vhaisaho vhadzulapo na mavhonele a u ḓikukumusa phanḓa ha vhadzulapo. Zwililo zwavho zwi katela vhuaḓa vhune ha khou humbulelwa, u langa masheleni nga nḓila i si yone, u sa tendelana, u dzhenelela kha mafhungo a masipala, na u shumisa maanḓa nga nḓila i si yone uḓi vhuyedza vhe vhoṱhe.
Murangaphanda wa tshitshavha na muambeli wavho,Vho Thabelo Manenzhe vhari vhadzulapo vho kondelela mafhungo a tshifhinga tshilapfu nga fhasi ha vhurangaphanda ha zwino, hu sa londwi ndingedzo dzo vhalaho dza u tandulula mafhungo nga kha nyambedzano.
"Thovhele vhashu vha a ḓikukumusa nahone a avhango ḓiimisela u thetshelesa tshitshavha. Hezwi zwo ri sia ri si na zwine ra nga ita nga nnḓa ha u thoma u tshimbila uhu ha mulalo u itela u takusa maipfi ashu. Sa tshitshavha, ri ṱoḓa odithi yo fhelelaho ya masheleni a tshitshavha u bva kha mbadelo dzoṱhe dzine vhadzulapo vha dzi badela sa zwikolodo kha mivhundu yo fhambanaho. Ri dovha ra ṱoḓa uri Thovhele Manenzhe vha litshe u dzhenelela kha tshumelo dzo ḓiswaho nga masipala, hu tshi katelwa na u phaḓaladzwa ha nnḓu dza RDP, sisiṱeme dza tshumelo dza ḓuvha na zwiṅwe," vha ralo.
U ṱangana ha zwa polotiki ha Thovhele na zwone zwo no vha mbuno ya u ṱaṱisana. Hu vhigwa uri vho vha vhe muraḓo wa mulanguli wa davhi wa ḽihoro ḽi vhusaho. "Ro vha ro lavhelela uri vha sa dzhii sia sa izwi vha tshi khou vhusa vhathu vha bvaho kha madzangano o fhambanaho a polotiki. Vhane vha sa vhe vha ḽihoro ḽavho vha dzula vhe na mbilaelo na u tambudzwa musi zwi tshi ḓa kha tshumelo," Vho Manenzhe vho engedza.
Vhagwalabi vho dovha vha ita khuwelelo ya u fhaladzwa nga u ṱavhanya ha Khoro ya Mvelele ya Manenzhe, yo rangwa phanḓa nga zwe vha zwi ṱalusa sa "muvhusi Vho Mpho Phaladi", vha tshi ri khoro ndi tshivhumbeo tsho khethiwaho zwi siho mulayoni. "Na mbilaelo ndi u lenga ha u rwelwa ṱari ha murangaphanḓa wa muvhundu wa Bale, ane a vha murwa wa munnaavhane Vho Johannes Manenzhe. Ri tama u vhona u leludza maitele nga u ṱavhanya," vho ralo.
Ho vha na ndingedzo dzo vhalaho dza u kwamana na Thovhele Manenzhe, fhedzi a vho ngo kona u swikelelwa musi hu tshi anḓadzwa tshiṱori itshi.