Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Zwiwo zwine ha vhonala dzi nḓou kha vhupo ha tsini ha vhugalaphukha ha Kruger National Park na mulambo wa Limpopo zwi khou vhonala zwi khou anda. Zwa maḓuvha o fhiraho nḓou dzosia zwpita pfudzungule vhuponi ha Masunda nnḓanyana ha Musina, he vhorabulasi vha tshinyadzwa nga nḓou idzo dzi tshi dzhena bulasini dzavho dza tshinyadza zwimedzwa zwavho, he vha xelelwa nga masheleni a zwigidi zwa dzi rannda nga kha zwimedzwa na zwibveledzwa.
Lwa miṅwedzi mivhili, vhadzulapo vha Tshitavha Sambandou na zwisi zwa tsini vhovha vha sa ḓivhi mulalo nga hone uvha hone ha nḓou idzi kha vhupo havho. Muṅwe wa vhadzulapo e a kwamea ndi rabulasi Vho -Avhesei Ndou, vhe zwimedzwa zwavho zwa tshinyadzwa. Vho Ndou, vhane vha lima dzi phiriphiri na miroho, vho amba zwauri ndi kale vhadzulapo vha khou lwa na nḓou idzi.
"Ndi kale hedzi nḓou dzi hone dzi tshi tambudza vhadzulapo. Dzo thoma u vhonwa thavhani dza tsini lwa miṅwedzi mivhili yo faho dza ḓou ngalangala. Tshifhinga tshoṱhe musi ri tshi dzi vhona, rovha ri tshi vhigela vha vhulangi ha dziphukha fhedzi vha si thuse sa izwi vhalanga vhugalaphukha vhovha vha tshi hana u dzi bvisa dzi thavhani. Vhovha vha tshi dzulela u ri vhudza zwauri uri vha kone u dzi bvisa vha ḓo tea u ṱhukhula misingo yadzo vha ṱuwa na ṱhoho dzadzo," vha amba.
Vho Ndou vho amba zwauri vhovha muṅwe wa vhorabulasi vhe mashudu mavhi vha vhona zwibveledzwa zwavho zwi tshi tshinyadzwa vhege yo fhiraho. "Ro xetshelwa sa vhorabulasi sa izwi dzo tshinyadza mitshelo na zwiṅwe zwimedzwa. Ro ḓou kombetshedzea u luka maano he ha humbelwa vhaswuhana uri vha ri thuse u dzi linda na bulasi dzashu," vha amba.
Vho Ndou vho amba nga ha nḓou nṋa dze dza vhonala nga Lavhuṱanu ḽa fumi-iṋa Fulwi. "Ro ḓou vhidza vhalanga vhugalaphukha, vhe vha ḓa vha dzhia mbili fhedzi vha ṱuwa nadzo, ngeno mbili dzo shavha. Vhadzulapo vho ḓou ḓiphina mafhelo a vhege musi vha tshi ḓi kanzwa nga nama ya nḓou, mashudu mavhi rine vha ha Ndou rori zwi ri fhire. Nḓou ndi mutupo washu zworalo ari koni uḽa nama ya nḓou," Vho Ndou vha engedza.
Muṅwe mudzulapo, Vho -Hope Mudau vhori naho vhatshe na nyofho ya nḓou idzi dzo shavhaho dzine dzi tshe afho nnḓa, vha livhuwa uri mbili dzadzo dzo vhulawa nama yadzo ya ḽiwa nga vhadzulapo. "Rovha na mafhelo a malapfu a dakalo ri tshi ḓiphina nga nama ya nḓou," vha amba.
Muambeli wa muhasho wa mveledziso ya ikonomi na vhupo Vho -Zaid Kalla vho khwaṱhisedza uri vho wana mivhigo nga ha nḓou dzo shavhaho hone vha fhindula nga tshihaḓu. "Vha muhasho vho isa vhaofisiri vha tshivhalo uri vha lange dzi nḓou, hone zwa zwino nyimele i khou langea. Nḓou mbili dzo farwa u swika zwino, hone vhaofisiri vhashu vha khou ṱoḓa dzinwe nḓou," vha amba.