Tshiṱori nga Victor Mukwevho Ne-vumbani. Ṱhalutshedzo nga Khathutshelo Raliphaswa.
Vhadzulapo vha fhiraho 300 u bva kha Tshiṱiriki tsha Vhembe vho konḓelela mutsho wau rotholaho, wa mvula vha tshitshimbila u bva Burohoni ḽa Mutale u ya luvhanḓeni lwa Makonde nga Mugivhela, ḽa 12 Lambamai, u itela u ḓivhadza nga ha dwadze ḽa khakhathi dzo ḓisendekaho kha mbeu (GBV) ḽine ḽa khou bvela phanḓa na u ṱhasela shango ḽashu na mivhundu ngau angaredza.
Mutshimbili uyowovha wo dzudzanywa nga kereke ya Tshikhiresite ya Precious Blood of Jesus Christ hu tshi khou elelwa ḓuvha ḽa bulayo la tshiṱuhu ḽa Funanani Patience Mbedzi Mundalamo, we a thuntshiwa a lovha musi e kerekeni nga mufarisi wawe.
Vhafunzi vha kereke dzo fhambanaho dza Tshiṱiriki tsha Vhembe vho ṱanganela kha mushumo uyu, hu tshi katelwa na Muevangeli Vho-H.B. Vho Ramulifho, vhane vha dovha hafhu vha vha mukhantselara kha Masipala Wapo wa Thulamela.
Muṅwe wa vhalwela mbofholowo vha GBV kha dzingu, Adv Vhutshilo Pertunia Madia, vho ita khuwelelo kha vhanna uri vha fare vhafumakadzi na vhana nga lufuno na ṱhonifho. "Ri khou ita khuwelelo kha muvhuso na mulayo uri vha tsireledze vhafumakadzi na vhana, nahone ri dovha ra ita khuwelelo kha vhafarisi vhane vha tambudza uri vha litshe mishumo yavho mivhili sa izwi vha tshi khou vhulaha lushaka nau panga nyofho kha vha murafho u ḓaho," vho ralo.
Vho Tshifhiwa Nepapame vhane vhavha vhafunzi vha kereke ya Precious Blood of Jesus Christ Christian Church vho livhuwa vhathu vhe vha vha vhe hone kha thikhedzo yavho. "Ri khou ita khuwelelo kha vhane vha si kone u dzhenela matshi wa ṋamusi uri vha ri ṱangane ṅwaha u ḓaho ri ise phanḓa zwe ra thoma nanwaha. Hezwi zwi ḓo vha mushumo wa ṅwaha muṅwe na muṅwe wa u ḓivhadza zwitshavha zwashu nga ha GBV," vha ralo.