Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Vhadzulapo vha kusi kwa Madombidzha vho rwa vha vhulaha muṱhannga wa minwaha ya fumi-malo we avha a khou humbulelwa u lingedza u ṱangula vhengele khole-khole vhuponi uho nga ḽa ṱhanu Tshimedzi. O rwiwa nga zwihali zwa u fhambana zwi huvhadzaho.
Muṱhannga uyo ndi Lavhelesani Sidogi wa u bva kusini kwa Tshikhwani.
We a sevhela vha nyanḓadza mafhungo ya Limpopo Mirror a hana u bulwa dzina, uri vhaṱhannga avho vhovha vhe vhararu vha tshi lingedza u ṱangula vho fara tshigidi tsha u tshakholekhole vha tshi kombetshedza mune wa vhengele uri a vha ṋee zwoṱhe zwire vhengeleni, ndi afho mune wa vhengele a tshi thoma u lwisana navho a fara Lavhelesani vhanwe vha shavha. Mune wa vhengele o ḓou huwelela a tshi ṱoḓa thuso, ndi he vhadzulapo vha swika nga vhunzhi vha tshi ḓa u phalala.
Tshiwo itsho tsho bvelela nga mathabama a awara ya vhuna. Muluma nḓevhe uri Lavhelesani o ḓou rwiwa lu shushaho, a siiwa hanefho a tshi welela kha vhuṱungu he avha a khou vhupfa husina ane a lingedza u mu thusa. Vha thuso ya shishi ya mutakalo vhori vha tshi swika vha hanelwa u thusa muṱhannga uyo ngavhadzulapo vhosinyuho vhukuma. "Zwovha zwithu zwavhuḓi uri o rwiwa a lovha, zwi isa mulaedza kha vhanwe vhaswa vhane vha ḓi dzhenisa kha zwa vhugevhenga. Ro neta nga vhugevhenga, hone na mapholisa a vha ri thusi musi ri tshi vhiga vhugevhenga. U dzhia mulayo ra vhea zwanḓani zwashu ndi yone thandululo ye ra salelwa ngayo," a tshi amba.
Vho Rosinah Sadiki, makhulu wa Lavhelesani vhari vho vhaisala vhukuma, vhari avha ḓivhi zwe zwa itea. "Ro lingedza u sedza thundu dzine vhathu vha ri o dzi ṱangula, na uri ho bvelela mini kha thundu idzo, fhedzi ahuna ane a khou ri sumbedza thundu idzo," vha amba.
Muambeli wa mapholisa, Vho Lt. Col Malesela Ledwaba, vho khwaṱhisedza tshiwo itsho vhari ho vulwa mulandu wa bulayo. Vha dovha hafhu vha kaidza vhadzulapo kha zwiito zwa u dzhia mulayo vha vhea zwanḓani zwavho zwine zwa sia vhathu vho lovha sa izwi hu mulandu nga wone une.
Mapolisa vha khou huwelela ane a ngavha e na vhuṱanzi vhune ha nga thusa kha mulandu uyu vha lume nḓevhe mapholisa a tshiṱitshi tsha tsini navho kana vha rwela ṱhingo kha nomboro dza lushaka dza 08600 10111.
Zwi tshi tevhela bulayo iḽi, vhadzulapo vhanzhi vha khou ḓi vhudzisa uri zwo fanela na uri vhadzulapo vha dzhie maga u swika afha kha u lingedza u lwa na vhugevhenga?. Nga murahu ha tshio itshi, zwileludzi zwa vhudavhidzani zwovha zwi khou bvuma nga vhupfiwa ha vhathu, vhunzhi havho vha tshi khou kaidza zwiito zwa vhadzulapo zwa u dzhia mulayo vha vhea zwanḓani zwavho.
Lavhelesani u ḓo vhulungwa Tshikhwani nga Mugivhela wa ḽa fumi-ina Tshimedzi. Tshumelo i ḓo takutshedza nga awara ya vhurathi nga matsheloni.