Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Vhafariwa vha swikaho zwigidi zwiraru vha dzhele khulwane ya Kutama-Sinthumule, ire Tshitandani vha ḓo pfuluselwa kha dzi dzhele dzo fhambanaho omona na Afrika Tshipembe, izwo zwo khwaṱhisedzwa nga minisiṱa vha tshumelo dza ndulamiso na vhulamukani Vho-Ronald Lamola, nga masiari a Lavhuvhili. Vhovha vhe tshipiḓa tsha vhaofisiri vhe vha dalela dzhele iyo u vhona tshinyalelo yo bvelelaho nga murahu ha u fhiswa ha dzhele iyo nga vhafariwa vhe vha vha vho sinyuwa nga masiari a Musumbuluwo.
Ho khwaṱhisedzwa u lovha ha mufariwa muthihi wa minwaha ya furaru-sumbe, hone ho huvhala vha fumi malo. Vhafariwa vho thoma mulilo uyo nga u sinyuwa na u gwalabela uri vha iswe kha dzinwe dzhele, hone vhovha vho no isa mivhigo ya u sa farwa zwavhuḓi nga vhaofisiri vhau linda dzhele.
Vhunzhi ha vhafariwa vho eḓela mudavhini wa dzhele iyo, nga u shaya vhulalo. Ho vhidzwa na vhaofisiri vha mapholisa, masole, na vhalindi vha tsireledzo vha phuraivethe uri vha thuse u linda vhafariwa avho. Muambeli wa muhasho wa tshumelo ya ndulamiso, Vho-Singabakho Nxumalo, vhari kha mulilo uyo ho kwamela phera yau bikela, na buloko mbili dzine dza dzula vhafariwa vha swikaho zwigidi zwivhili.
Minisiṱa Vho-Lamola vho dalela dzhele nga Lavhuvhili, vho fhelekedzwa nga minisiṱa muthusi wavho Vho-Phathekile Holomisa, na mukhomishina wa lushaka vha muhasho wa tshumelo ya ndulamiso, Vho-Makgothi Thobakgale.
Kha nyambedzano ye ya farwa nga murahu, Vho-Lamola vho livhuwa vhaofisiri na dzinwe tshumelo dza shishi kha u langa nyimele nau thivhela vhafariwa kha u nenga. Vhari vhaḓivhi vha khou sedzulusa tshivhangi tsha mulilo uyo. Vho dovha hafhu vha fulufhedzisa uri vhe vha thoma mulilo uyo vha ḓo livhaniswa na tshanḓa tsha mulayo. "Ri tou livhuwa hu songo swa zwipiḓa zwoṱhe zwa dzhele kana uvha na vhafariwa vho nengaho," vha engedza.
Vho-Thobakgale, vhari mufariwa o lovhaho ndi mufariwa e avha o farelwa bulayo hone o gwevhila minwaha ya furaru-raru. "Vha muhasho vha ḓo ḓivhadza vha muṱa wa mufariwa uyo nga ha tshiwo. Hu ḓo dovha hafhu ha ḓivhadzwa vha miṱa ya vhanwe vhafariwa nga ha u pfuluselwa kha dzinwe dzhele havho,"vha engedza.