Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Mpfu dza tshivutshela dza vhafunani vhaṱuku fhaḽa Dzwerani Mirenzheni, tsini na Ṱhohoyandou, mafhelo a vhege yo fhiraho o sia vhadzulapo vho shushwa. Hu khou humbulelwa uri muṱhannga uyo o shelela mufunwa wawe mulimo nga murahu ha izwo a ḓi haṱula vhutshilo hanefho ngomu lufherani. Tshiwo tsho bvelela nga Sondaha nga mathabama.
Vhafunani avho vho bulwa sa Ondwela Mulelu (17) wa u bva Khwekhwe, na Orinea Mangwane (24) wa u bva Dzwerani. Muofisiri wa vhudavhidzani ha mapholisa a Vhembe, W/O Vho Vuledzani Dathi, vhari musi mapholisa vha tshi swika afho lufherani he tshiwo tsha bvelela hone, vho swika vha wana Ondwela o lovha e nṱha ha mbete, ahuna mafuvhalo a vhonala e avha e khae. Hovha hu tshi touvha na lupulo lwe lwavha lu khou bva mulomoni wawe. Mapholisa vho dovha hafhu vha wana tshiputo tsha dzi philisi tshi sina tshithu na mulimo wa miri ya tshirema. Kha lufhera ulwo, ho wanwa na Orinea onembelela kha ṱhanga hone zwanḓa zwawe zwo vhofhelwa nga murahu hawe.
Ahuna are na vhuṱanzi uri ndi mini zwe zwa bvelela zwe zwa swikisa kha mabulayo aya mavhili, fhedzi hu khou humbulelwa na u tambudzana nga mbeu. Ho vulwa milandu mivhili ya u sedzulusa mabulayo aya, hone tsedzuluso dzi khou bvela phanḓa nga mapholisa a Vuwani.
Uya nga zwe vha nyanḓadza mafhungo vha sevhelwa zwone, Ondwela ovha oya Dzwerani sa izwi hovha hu maḓuvha a u awela a zwikolo.
Mmane wawe, Vho Mpho Mulelu, vhari vhafunani avho vho ḓa u vha dalela nga Lavhuvhili ḽa fumbili-rathi Khubvumedzi, Hovha hu sina na tswayo dza uri hovha hu na khuḓano vhukati ha vhafunani avho. Vho fhedzisela u vhona Ondwela nga matsheloni a ḓuvha ḽe tshiwo tsha bvelela ngalo.
"O ṱuwa a songo laela uri o livha ngafhi, zwe a amba ndi uri u ḓo vhuya. Ndo tou wana ṱhingo ndi tshi vhigelwa lufu lwawe nda ṱavhanya nda ya afho he zwa itea hone. Zwine zwa vhavha ndi uri vhafunani avha vho sia ṅwana wa miṅwedzi ya rathi ane a ḓo aluwa a sina vhabebi vhoṱhe. Ondwela ovha a si muthu ane a amba nga ha mathada awe. Nga ṅwedzi wa Fulwana ṅwaha uno, Orinea ovha o dzhia ṅwana wavho nga khani, fhedzi Ondwela a si zwi vhudze muthu fhano hayani na uri khuḓano yo vhangwa ngani hango amba. Lufu lwawe lwo sia ri na dzi mbudziso u fhira dzi phindulo," vha amba.
Mudzulatshidulo wa siviki ya Madala/Mirenzheni ya vhupo uho, Vho Shumani Nekhavhambe, vhari vhadzulapo vha kusi nga u angaredza vho shushwa nga mabulayo aya mavhili. "Ndi tshifhinga tshi konḓaho kha rine roṱhe. U xelelwa nga vhaswa vhavhili nga khathihi ndi u xelelelwa zwihulu. Ndovha munwe wa vhe vha thoma u swika lufherani lwavho, zwovha zwi khou ofhisa. Zwe roṱhe ra ḓi vhudzisa ndi uri Orinea o kona hani u ḓi vhofhela na ṱhanga ngeno huuri zwanḓa zwawe zwovha zwo vhofhelwa nga murahu. Ro wana na vhurifhi he ha fhedza ho dzhiiwa nga mapholisa. Zwine zwa vhaisa ndi uri ari nga ḓo ḓivha uri ho iteani afho lufherani. Ri tama uri vhafunani vhaswa vha tshi ṱangana na dzi khuḓano, vha ṱoḓe thuso zwithu zwi sa athu u tshinyala zwa swika kha mabulayo," vha amba.