Tshiṱori nga: Elmon Tshikhudo. Ṱhalutshedzo: Khathutshelo Raliphaswa.
Vhafunzi Vho-Muritho vho fara bembela ḽihulu ḽa mmbwa yavho.
Vhafunzi, muporofita Vho-Innocent Muritho avha ofhi u mangadza tshitshavha nga maitele ane a sia vhanzhi na dzi mbudziso. Nga ṅwaha wa gidimbili fumbilithihi, vhafunzi avha vha tshivhidzo tsha Talitha Koum Ministry ire Sibasa vho sia vhanzhi vho akhamala nga nyanḓadzo ya dzi vidio dza tshivhalo dze vhafunzi vha vha vha khou ḓi kukumusa nga ha dzangalelo ḽavho kha zwa vhudzekani. Nga zwiito izwo, vhafunzi vho kaidzwa nga tshitshavha na miraḓo ya tshivhidzo tshavho, he vha swikelela khau humbela pfarelo tshitshavhani nga ha zwiito zwavho.
Nga Mugivhela wa ḽa fumbiliṱahe Fulwana, ho farwa bembela ḽi ḓuraho vhukuma, hu tshi pembelwa ḓuvha ḽa mabebo ḽa mmbwa iyo, Jackie. Jackie yovha i khou pembelwa uvha na minwaha ya sumbe. Kha bembela iḽo ḽe ḽa farelwa kerekeni ya vhafunzi Vho-Muritho ngei Sibasa, ho ṱhavhiwa kholomo hu tshi bikelwa vhaeni vhe vhavha vho ḓadza kereke iyo. Kha dzi mpho dza mmbwa iyo, ho humbelwa uri vhathu vha ṋee masheleni vhasi ḓise dzi mpho.
Asi vhanzhi vhathu vhe vha takalela maitele aya, he Vho-Mashudu Malitsha vha vha munwe wa vhe vha ḓi vhudzisa uri naa maitele aya o ṱanganedzea na. "Ria thoma u vhona zwithu zwa u rali zwi tshi itea, zwihulu kha muvhuso na tshifhinga tshine vhathu vha shaya zwiḽiwa, na mishumo hone vhanwe vha tshi touvha zwishai," vha amba.
"Masheleni ayo ovha a tshi nga ṋeiwa vhashayaho, kana u shumiswa kha zwithu zwi vhuyedzaho vhathu, u fhira u i shumisa kha tshifuwo. Ripfa ro nyamiswa nga maitela aya a munna wa Mudzimu, ane a dzhia masheleni kha vhashai uri a kone ui shumisela tshifuwo," vha engedza.
Naho vhathu vhanzhi vha khou hanedzana na maitele a vhafunzi, vhone vha kha ḓi imelela maitele avho he vha kanḓisa poso kha siaṱari ḽavho ḽa Facebook: "Vhathu vha nga amba zwine vha ṱoḓa, fhedzi nne ndi muthu ane a funa zwifuwo zwanga. Vhathu vha vhilaela nga masheleni anga e nda a shuma ndi ndoṱhe, vhathu vhane vha vhilaela uri ndi fanela u thusa vhashai, vhone vho no thusa vhashai vhafhio ?. Ndi funa zwifuwo zwanga, lune mmbwa iyi ndi ṱoḓa u i rengela moḓoro. Ndo thoma u funa zwifuwo nga u vhona dzi mbekanyamushumo dza zwifuwo kha thelevishini lune arali ndi tshi swikelela u pembela mmbwa dzanga, ahuna ane a ḓo nthivhela u zwi ita."