Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Vhafuwi vhanzhi vhuponi ha Niani vha khou bvela phanḓa na u lila nga ha u tsweliwa havho zwifuwo zwavho. Mavemu aya ha khou tswa kha vhupo ha Niani fhedzi, vha khou ṱhasela na kha zwisi zwinzhi zwa vhupo ha Vhembe, hu tshi katelwa Hagumbu, Masisi, Mukununde, Malele na hunwe hunzhi. Vhafuwi vha khou xelelwa zwihulu nga u tswiwa uhu.
Vhege mbili dzo fhiraho, Vho Colbert Mukwevho, vhane vha vha mufuwi u bva kusini kwa Malale, vho wana ho tswiwa na uvhukahwa ha kholomo dzavho dza sumbe. "Ndo ṱingaṱinga ndi tshi sedza zwifuwo zwanga hune zwa fula hone, fhedzi ndi si zwi wane. Ngauri na ḓuvha ḽovha ḽo no wela, ndo humbula uri ndi ḓo zwi wana ḽi tshi tsha ngatshamatshelo." vha amba.
Zwe Vho Mukwevho vha ṱangana nazwo nga matsheloni zwovha zwi shushaho na masinḓambilu. "Mavemu vho ṱhukhula ṱhoho na milenzhe ya kholomo dzanga, vha dzhia nama vha laṱa ṱhoho ḓakani," vha engedza.
Vho Mukwevho vhari vha humbula uri mavemu ayo a ḓovha o rengisela vhane vha dzi butshara nama idzo. Vhari tshiwo tsha u rali a tshi thomi u itea, fhedzi vhovha vha sa humbuli uri zwi nga dovha hafhu zwa itea. Vhari: " zwine zwa khou itea a touvha masinḓambilu kha vhane vho ḓi netshela kha vhufuwi ha vhupo hashu. Ri ḓo takala na u rudza mbilu musi mapholisa vha tshi fara mavemu o zwi itaho. Ndo tou pfesa vhuṱungu sa izwi inwe ya kholomo dzanga yovha yo ḓi hwala,"
Hu tshi angenyelwa masheleni ane vho a lozwa nga u tswiwa uhu, ndi masheleni a swikaho zwigidi zwa maḓana a malo, hone vha khou humbela uri ane a vha na zwine zwa nga thusa, a vha lume nḓevhe kana mapholisa.
Vho Sunday Mpofu, mudzulatshidulo wa foramu ya zwifuwo zwa Masisi, vho khwaṱhisedza uri zwiwo izwi zwi kha ḓi bvela phanḓa, mavemu a khou tswa na u via zwifuwo zwa vhathu vha tshi itela u rengisa nama kha butshara dza hayani na u wela Zimbabwe. "U bva mahola, ro fhaṱa vhushaka ho khwaṱhaho na vhathu vha Zimbabwe, vhane zwa zwino vha ari luma nḓevhe musi zwifuwo zwa shango lashu zwi tshi swika Zimbabawe," vha amba.
Vho luthanennthe kholonele Malesela Ledwaba, muambeli wa mapholisa a Limpopo vhari vhaḓivhi vha khou bvela phanḓa nau sedzulusa milandu iyi ya u tswiwa ha zwifuwo.