Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Vhafuwi vha zwifuwo vhuponi ha Midoroni vha khou hotefhadzwa ngau tswiwa ha zwifuwo zwavho. Nga ṅwedzi wa Khubvumedzi fhedzi, vho tswelwa zwifuwo zwine zwa swika zwa furathi-ṱhanu zwa dzi kholomo na dzi mbudzi. Vhari hezwi zwi vhea mveledziso ya zwifuwo zwavho khomboni sa izwi vha khou xetshelwa nga masheleni a maḓana a dzi rannda.
Vho Eric Muvhali, vhane vha vha mufuwi vhe vha tswelwa kholomo dza fumi, vhari a vha nga ḓo dzula fhasi u swikela mavemu ane a khou tswa zwifuwo zwavhafuwi vhuponi uho vha tshi farwa vha vhonana na tshanḓa tsha mulayo. " Uri ndi swika kha uvha na zwifuwo zwi nnzhi, zwo ndzhiela minwaha minzhi, fhedzi mavemu vha da vha tshinyadza hu sa athu u fhela na tshifhinga tshingafhani. Ndi tenda uri ndi vhathu vhathihi vhane vha khou tswa dzi mbudzi vha vhafuwi vhapo. Nyimele heyi i a ri lemela sa vhafuwi. Ndo xetshelwa nga masheleni a swikaho zwigidi zwa ḓana-fuṱhanu wa dzi rannda. Zwa zwino ndo sala ndi sina masheleni, hone u ṱhogomela kana unda zwifuwo zwia ḓura maḓuvha ano," vha amba.
Munwe wa vhafuwi, Vho Piet Raphasha, vhari vho xelelwa nga mbudzi dza malo, vhari: "Zwine zwa vhavha ndi uri u tswiwa ha zwifuwo ndi mafhungo a ḓuvha liṅwe na liṅwe. Ri dovha hafhu ra vha na dzi khaedu dza u isa mivhigo ya u tswiwa ha zwifuwo. Ndi munwe wa vhafuwi vhe vha isa mivhigo kha tshiṱitshi tsha mapholisa tsha Tshilwavhusiku, fhedzi ndo no laṱela thaula uri zwifuwo zwanga zwi ḓo wanala."
Vhari vhafuwi vhapo vhuponi uho vha vhilaedzwa nga u tswiwa uhu, hone vho no lingedza u ṱoḓa thusa, fhedzi ahuna thuso ine ya ḓa.
Muambeli wa mapholisa a Limpopo, Vho Malesela Ledwaba vhari vha khou ṱangana na khaedu ya u vhigelwa mbilaelo nga ha u tswiwa kha vunḓu iḽi. Uya nga Vho Ledwaba, mavemu vha anzela u vhea iṱo kha zwifuwo zwine zwavha zwi khou fula zwi sina vhalisi.
"Ri khou humbela thuso kha vhadzulapo uri vha thuse nga vhuṱanzi vhune vha nga vha vha naho kha u fara mavemu aya," hu amba Vho Ledwaba.