Tshiṱori nga: Maanda Bele. Ṱhalutshedzo nga: Khathutshelo Raliphaswa.
Ḽovha ḓuvha ḽa zwililo ḽi ṱungufhadzaho kha vhatevheli vha ḽitambwa ḽa thelevisheni, Muvhango, musi Gabriel Temudzani ane a ḓivhea nga Vhafuwi Vho-Azwinndini Gandamipfa Mukwevho vha tshi vhonadzwa lwau fhedza nga Musumbuluwo wa ḽa malo Shundunthule. Vhafuwi Vho-Mukwevho vho thuntswa vha vhulawa nga muzwala wavho Tendamudzimu Mudau, phanḓa ha mufunwa wavho wa kale Vho-Susan Mukwevho. Tenda o vha vhulaya hu nḓila yau lifhedza vhathu vhoṱhe vhe vha mu isa khothoni.
Vho-Temudzani vhane vha bva kha kusi kwa Tshivhilidulu Nzhelele, vho vha muraḓo wa ḽitambwa minwaha ya fumbiliraru yo fhelaho, vha tshe na minwaha ya fumbili fhedzi. Kha minwaha iyi ya fumbiliraru vhe muraḓo wa Muvhango, vho takalelwa nga vhatevheli vhanzhi. Vha tshi onesa vhatevheli vhavho kha siatari ḽavho ḽa Facebook, vho nwala vhari: "Kha nne hovha husi mafhungo a uvha na zwikili zwau tamba fhedzi, huvha hu uvha na lutamo lwau anḓadza luambo lwa damuni kha vhane vha ḓo lu takalela nau lu pfesesa nau mona na ḽifhasi nga kha u bveledza zwiṱori. Ndi livhuwa zwihulu vhatevheli vha Muvhango vhe vha nṋea thikhedzo lwa minwaha iyi ya fumbiliraru. Nda dovha hafhu nda laela kha vhashumisani vhanga ubva kha SABC, lwendo lu khaḓi bvela phanḓa, na nne ndi mutevheli wa Muvhango."
kha nyambedzano na vha gurannḓa ya Limpopo Mirror, Vho-Temudzani vhari vho guda zwinzhi kha Vhafuwi Vho-Mukwevho. "Vhafuwi vhovha vha tshi funa nau ṱhogomela vhana vhavho na muṱa wa musanda. Uvha Vhafuwi zwo nngudisa uri muthu ha tshili e eṱhe hone u fanela u thetshelesa vhanwe," vha amba.
Vhari tshipiḓa tshe vha tshi takalela vhukuma musi vha tshi tamba uvha Vhafuwi ndi musi vhatshi lwela ifa ḽa muṱa nga murahu hau dzula tshiduloni tsha vhuhosi.
Vho-Temudzani vhari vha ḓo ḓivhadza nga mushumo wavho u tevhelaho kha nḓowetshumo ya vhumvumvusi. "Zwa zwino athi koni u amba hune nda khouya hone u bva hafha, a thi ṱoḓi u amba nga zwithu ndi saathu uvha nazwo. Ndi khou sedzana na mishumo minzhi zwa zwino u fana na bindu ḽanga ḽa vhuendeli nau alusa vhana vhanga." vha engedza.
Ubva nga nwaha wa gidimbili fumirathi, Vho-Temudzani vho thoma zwa vhulimi.
Munwe wa vharangaphanḓa vha kusi kwa Tshivhilidulu, Vho-Ntshengedzeni Robert Mamphasa, vhari vha aḓi rwa khana nga zwe Vho-Temudzani vha bveledza. "Vha touvha muḓivhalea washu. Rovha vhona vha tshi aluwa kha kusi kwashu, hone lwa minwaha iyi ya fumbiliraru ri tshi vha ṱalela kha theḽevishini, rovha ri tshi takala vhukuma. Rivha ṱuṱuwedza uri vha dzulele uvha na vhuthu na ḓi ṱukufhadza hoṱhe hune vha ya, vhasi hangwe huna vha bva hone," vha amba Vho-Mamphasa.