Tshiṱori nga Silas Nduvheni. Ṱhalutshedzo nga Khathutshelo Raliphaswa.
Vhagudiswa vha nṱhesa vha gireidi ya 12 vha tshiṱiriki tsha Vhembe vha 2024 vho huliswa kha vhuṱambo ha u ṋea pfufho ho farelwaho Nandoni River View Lodge nga Mugivhela. Vhaeni kha vhuṱambo ho katela ṋeḓorobo muhulwane wa Masipala wa tshiṱiriki tsha Vhembe, Vho Freda Nkondo, na mudzulatshidulo wa Tshiimiswa tsha Tshumisano ya Pfunzo ya Lushaka (NECT) ngei Limpopo, Muhaṱuli Vho Raulinga.
Murendeni Ndanduleni wa Musanda Foundation vho ṱanganedza vhagudiswa vha kale vha Gireidi ya 12 vha 27 vhe vha ḓa kha mushumo uyu. He havha vho katela Phathutshedzo Mudzanani u bva Tshikoloni tsha nṱha tsha Fhatuwani, we a vha mushumeli wa nṱhesa kha shango kha zwikolo zwa Quintile 1 (zwi sa badelwi), na Wangoho Mudau u bva Tshikoloni tsha nṱha tsha Mbilwi, we a wana maraga dza nṱhesa kha mbalo kha shango. Hafhu ho vha hu Nnzumbululo Todani, u bva tshikoloni tsha Mbilwi, we a vha wa vhuvhili kha lushaka kha mvelelo dza nṱhesa dza zwikolo zwa Quintile 4 na u vha wa u thoma kha vunḓu ḽa Limpopo, na Lalamani Maselesele u bva Sekondari ya Tshivhase, we a bveledza mvelelo dza vhuvhili dza nṱhesa ngei Vhembe Vhubvaḓuvha nahone a vha nṱha ha mvelelo dza ṅwaha. Zwikolo zwa Quintile 2 Afrika Tshipembe.
Kha mulaedza wavho wa u fhululedza, Khosi Muelekanyi Tshivhase vho amba uri dzingu ḽa Vhembe ḽo sumbedza kushumele ku mangadzaho kha zwa pfunzo ṋaṅwaha. Zwihulwane, Tshiṱiriki tsha Vhembe Vhubvaḓuvha tsho swikelela tshivhalo tshi mangadzaho tsha u phasa tsha 85.8%.
"U ḓiimisela haṋu, u konḓelela na u shuma nga maanḓa zwo ni ḓisa fhano ṋamusi. Vho vhea tsumbo i penyaho uri vhaṅwe vha i tevhele, vha tshi sumbedza uri u vha wavhuḓi zwi a konadzea, naho vho sedzana na khaedu. Zwine na zwi swikelela a si nomboro kana gireidi fhedzi; dzi imela awara ndapfu dze na dzi ṋekedza kha u guda, u ḓikumedzela he na ita na u ḓikumedzela haṋu hu sa dzinginyei kha u swikelela zwipikwa zwaṋu," hu amba Khosi Vho Muelekanyi Tshivhase.
Vha Tshivhase Development Foundation Trust vho ṋea mugudiswa wa nṱhesa kha vha 27 masheleni a rannda dza zwigidi zwiṱanu. Vha Domba Trust vho dovha vha ṋetshedza R10,000 kha vhaṅwe vha vhagudiswa vha 12 vha nṱha vha Limpopo.
Nedorobo Vho Freda Nkondo vho fhululedza vhe vha swikelela na u vha humbudza uri vha ite khumbelo ya Tshikwama tsha Basari tsha Nedorobo wa Vhembe phanḓa ha Ḽavhuṱanu ḽa 24 Phando.