Tshiṱori nga Kaizer Nengovhela. Ṱhalutshedzo nga Khathutshelo Raliphaswa
Vhagudiswa vha kale vha tshikolo tsha nṱha tsha Mphephu High tshine tsha wanala Nzhelele, vho farana zwanḓa uri vha takulele nṱha mvelelo dza murole wa vhufumi na vhuvhili kha tshikolo itsho.
Vhagudiswa avho vha kale ndi vhe vha kuvhangana nga Mugivhela wa ḽa ṱahe Ḽara, fhaḽa Madi a Thavha hure nnḓa nyana ha ḓorobo ya Louis Trichardt uri vha kone u ambedzana nga ha maga ane vha ḓo a dzhia uri vha tikedze tshikolo. Tshikolo itshi tsha Mphephu High ndi tshine tshovha tshi tshi vhonala tshi tshi khou rangaphanḓa zwikolo zwau mona na Vhembe lwa minwaha minzhi. Nga nnḓa ha zwe vha kona u bveledza sa tshikolo, vha dovha hafhu vha ṱangana na dzi khaedu, u bva kha mveledziso ya themamveledziso uya kha ṱhoḓea dza u funza.
Tshigwada itsho, nditshine vha ḓi vhidza Mphephu High Former Students, vha tenda zwauri zwinzhi zwi nga itwa uri hu thusiwe tshikolo itshi. Mudzulatshidulo wa tshigwada, Vho Eddy Singo, vhari zwine vha ḓo ita u thoma ndiu ṱola tshoṱhe zwithu afho tshikoloni, vha sedza zwoṱhe zwine zwa khou ṱoḓea. "Ri ḓo humbela thuso kha vhalambedzi vhau fhambana, uri ri kone u alusa masheleni ane aḓo thusa khau khwinifhadza tshikolo. Sa mugudiswa wa kale wa tshikolo itshi, ndi tenda zwauri hu na zwinzhi zwine zwa fanela u itiwa u khwinifhadza nḓila dzau guda kha hetshi tshikolo. Ri ṱoḓa pfunzo yo khwaṱhaho na fhethu ha khwine hau gudela," vha amba.
Vho Singo vho engedza zwauri komiti ntswa yo khethiwaho iḓo shuma na vhafaramikovhe vhau fhambana. "Komiti iyi asi tshivhumbeo tsho imaho nga tshoṱhe. Tshi ḓo shumisana na vha khorombusi (SGB), vha khoro ya musanda, vha SANCO, vha foramu ya pfunzo ya Nzhelele, na zwiimiswa zwau fhambana muvhunduni na vhaṅwe vhane vhavha na ndivho nthihi na rine yau vusuludza ifa ḽa tshikolo itshi. Ri ramba muthu munwe na munwe ane a tama uvha tshipiḓa tshashu, are na lufuno kha tshikolo tsha Mphephu High uri vhaḓe ri thusane kha zwine ra khou ṱoḓa u ita," vha amba.
Vho dovha hafhu vha ṱuṱuwedza vhagudiswa uri vha lavhelesane na ngudo dzavho nau ṱhonifha vhadededzi vhavho. "Zwe zwa itea ri khou zwi vhea murahu zwoṱhe. Zwa zwino ri na tshikhala tshau ita zwiswa uri ri kone u bveledza zwa khwine." Vho Singo vho dovha hafhu vha ṱuṱuwedza vhabebi uri vhavhe na vhusedzi kha ngudo dza vhana vhavho. "Vha dzulele u sala murahu nḓila ine vhana vhavho vha khou shuma ngayo tshikoloni. Vhavha vhudzise uri zwi khou tshimbila hani zwa tshikolo, sa izwi vhunzhi ha vhana vha sa ambi zwine vha khou ṱangana nazwo," vha amba.