Tshiṱori nga: Kaizer Negovhela. Ṱhalutshedzo nga: Khathutshelo Raliphaswa
Vhagudiswa vha tshikolo tsha nṱha tsha Ozias Davhana kha kusi kwa Mpheni vho dzhenelela muṱaṱisano wa SITA CSR Robotics na Coding ya zwikolo zwa nṱha ngei Yunivesithi ya Mpumalanga, 25 Ṱhafamuhwe, he vha dzhia vhuimo ha u thoma vha netshedzwa na masheleni a linganaho R1 100 000 ngau sumbedzisa vhutsila havho nau bveledza thandululo dza thaidzo dzine vhathu vha ṱangana nadzo.
Vho vhona uri vhaaluwa na vhaholefhali vha kundelwa u ḓi itela zwithu nga zwifhinga zwine vhaṱhogomeli vhavho vhavha vha siho. Thandululo kha thaidzo idzi vho vhona uri ndi khwine uri huvhe na dzi robotho dzine dza ḓo vha thusa u vha ṋea zwiḽiwa na mishonga yavho nga tshifhinga. Vho ṅwala maanea nga thaidzo na thandululo idzi, nga maanea aya vha topolwa uvha vha khwine u dzhenelela muṱaṱisano Yunivesithi ya Mpumalanga vha tshi imedzana na vhagudiswa vha zwikolo zwa u mona na shango.
"Ri aḓi hudza nga vhagudiswa vhashu sa izwi vho vhea tshikolo tshashu kha mapa. Ri livhuwa vhagudiswa vhashu vho zwi kona u wina. Tshelede ye vha wina i ḓo shumiswa u fhaṱa ḽebu ya dzi robotho tshikoloni tshavho," hu amba Vho-Sewela Sasa vho ḓalelwa nga dakalo. Vho-Sasa vha dovha hafhu vha fhululedzwa kha uri vho kona u vheekanya thimu na u vha dededza.
Kha nyambedzano na vha gurannḓa ya Limpopo Mirror, Rhandzu Hllungwane ane avha munwe wa vhagudiswa vha thimu iyi uri u wina hovha husi havho fhedzi, hovha hu u wina ha vunḓu ḽoṱhe ḽa Limpopo. "Lwovha lwendo lu songo leluwaho fhedzi ri livhuwa mudzimu uri ho wina tshikolo tshashu. Vhadzulapo vha Limpopo vha fanela uvha vha khou ḓi hudza nga rine sa izwi rine vha vunḓu ḽo nyadziwaho ra dzhia vhuimo ha u thoma. Ro ḓi nekedzela kha dzi nzunzanyo dza muṱaṱisano uyu, ro takala vhukuma uri maanḓa ashu o ri shumela," hu amba Rhandzu o ḓalelwa nga dakalo.
Vho-Mavhungu Lerule Ramakhanya, MEC wa pfunzo Limpopo, vho sumbedza u takala nga u wina ha tshikolo tsha Ozias Davhana. "Ndi fhelelwa nga maipfi au ṱalusa nga nḓila ine ra ḓi hudza nga vhagudiswa vhashu, zwihulu hu vhagudiswa vha tshikolo tshine ahuna zwishumiswa zwo fanelaho. A zwingo leluwa uri zwi itee lune zwi fanela u takalelwa sa uḓi netshedzela nau kona zwine ra vhona kha vhugudiswa vhashu," vha ralo.