Tshiṱori nga: Musina News. Ṱhalutshedzo nga: Khathutshelo Raliphaswa.
Zwifhinga zwa mvula khulu na maḓumbu zwine zwa tshinyadza vhupo ndi zwifhinga zwine vhadzulapo vha Hamutele na zwisi zwa tsini vho no zwi ḓowela, zwihulu vhagudiswa na vhadededzi vha tshikolo tsha nṱha tsha Fhetani. Nga zwifhinga izwi, vhadzulapo vha vha na khaedu ya u kundelwa u vhonana kana u swika kha zwisi zwa tsini nga hone uvha na madi ane akhoulela ashushaho.
Mafhungo mavhuya kha izwi ndiuri izwi zwoṱhe zwi nga swika magumoni, sa izwi vha masipala wapo wa Musina vho wana ndambedzo ya masheleni a swikaho miḽiyoni dza raru khoma ṱhanu wa dzi rannda ubva kha vha u netshedza magavhelo a ndinda khombo a bvaho kha masipala uri vha kone u tandulula khaedu yavho.
Mushumo wau ḓivhadza vhorainzhiniara wo farelwa ofisini ya lushaka ya Mutele nga Lavhuṱanu ḽa ṱhanu Lambamai. Kha vhe vha swika kha mushumo uyo hovha vhaimeleli vha khoro ya muvhundu, vhaimeleli vha bvaho kha masipala wapo wa Musina, na vhorainzhiniara vha bvaho kha maga ḽa Diges. Tshigwada itsho tsha vhorainzhiniara vho neiwa mushumo wauri vha tea u bveledza maano a mushumo na u zwi netshedza kha vha masipala uri vha kone u wana vha thendela vhane vha ḓo shuma mushumo.
Neḓorobo vha Musina Vho Nkhanedzeni Godfrey Mawela vho vhudza vhathu vhe vha vha vhe kha guvhangano ḽa vhadzulapo uri u dzhenelela kha zwipiḓa zwoṱhe zwa mushumo uyu ndi zwa vhuṱhogwa. "Ro takala u vha fhano u ḓivhadza vhorainzhiniara avha kha vhoiwe, vhadzulapo, uri vhadzulapo vha kone u thusa nga zwidodombedzwa dza ṱhoḓea dzavho kha u lugisa khaedu idzi," vha amba.
Vho Mawela vho amba zwauri ngauri mushumo uyu ndi wa tshihaḓu, zwithu zwoṱhe , hu tshi katelwa na dzi ndugiselo, zwi fanela u fhedziwa hu sa athu u fhela minwedzi miṋa. "Ri fanela u shuma nga tshihaḓu uri ri kone u fhedza mushumo uyu hu sa athu u swika khalanwaha ya dzi mvula. Ri dovha hafhu ra ḓivha nga ha gavhelo ḽe ra netshedzwa uri asi ḽine ḽa ḓo kona u swika kha u fhela ha mushumo washu, fhedzi ri fanela u ita zwoṱhe nga hune ra kona nga masheleni ane ravha nao fhedzi ri tshi shumisa zwishumiswa zwine ra vha nazwo uri mushumo washu uvhe wa maṱhakheni," vha amba.
Rainzhinia a bvaho kha ḽimaga ḽa Diges, Vho Moses Makuruvi, vho amba zwauri vha ḓovha na zwibveledzwa zwivhili zwine vha ḓo nanga tshithihi tshazwo. "Zwi tshi bva kha zwishumiswa zwine zwavha hone, ri ḓo sedzulusa zwibveledzwa zwoṱhe zwine ra nga shumisa u fhaṱa muratho muṱuku kana u vusuludza muratho wa mulambo wa Mutale une wa yela tshikoloni tsha nṱha tsha Fhetani. Ri nga humbula nau shuma afho hoṱhe arali zwishumiswa zwa tenda, fhedzi ri ṱoḓa tshifhinga tshinzhi u shuma kha zwibveledzwa nga tshihaḓu uri vha thendela vha kone u fhedza hutshe na tshifhinga," vha amba.