Tshiṱori nga: Maanda Bele. Ṱhalutshedzo nga: Khathutshelo Raliphaswa
Tshikolo tshine tsha wanala kha vhupo ha Nzhelele vha khou sasaladzwa zwi tshi tevhela u shumisa tshigwada tsha vhathu vhane vha ambara zwiambaro zwa mivhala ya tshisole uri vhaḓe uvha "gudisa mikhwa" kha vhagudiswa vhane vha sika dzi khuḓano na pfudzungule tshikoloni itsho. Uya nga muvhigo wa zwe zwa itea ubva kha vhagudiswa, vhari vho ṱhaselwa, vhaṅwe vhavho husina zwe vha tshinya kana u khakha.
Tshiwo itsho tsho itea nga Ḽavhuṱanu ḽa vhege yo fhiraho tshikoloni tsha nṱha tsha Tswime tshine tsha wanala Mauluma khala Nzhelele. Vhanwe vha vhabebi vhe vha amba na nyanḓadza mafhungo ya Limpopo Mirror fhedzi vha hana u bulwa dzina vhari ndi kale kha tshikolo itshi vha tshi ṱangana na u shumiswa ha zwidzidzivhadzi nga vhagudiswa. Fhedzi naho zworalo ahuna vhabebi vha vhagudiswa avho vhe vha tendelana na zwiito izwi zwau ṱhasela vhagudiswa vhane vhakhou pomoka ushumisa kana milandu ya zwidzidzivhadzi.
Ṱhoho ya tshikolo, Vho Ravele, vha khou humbulelwa uri vho ḓisa tshigwada tsha vhathu uri vhaḓe vha ambe na vhagudiswa nga hau shumisa zwikambi na zwidzidzivhadzi. Vhaṅwe vha vhabebi vha tenda uri tshigwada itsho ndi tshine tsha ṱumanyiwa na zwigwada zwa vhulindi ha tsireledzo kha vhupo ha Vhembe vhane vho dovha vha ḓi dzhenisa kha nndwa dza vhugevhenga sa izwi vha tshigwada tsha vhathu vhe vha ambara zwiambaro zwa mivhala ya tshisole.
U ṱhaselwa ha vhagudiswa zwo thoma nga murahu ha tshumelo ya thabelo ya tshikoloni ya nga matsheloni, he tshigwada itsho tsha "masole" vha thoma u amba na vhagudiswa. Muṅwe wa vhagudiswa o ṱalutshedza zwe zwa itea.
O ṱalutshedza zwauri: "rori ri tshi vhona vhathu avho vha tshi bvelela nga zwiambraro zwa mivhala ya vhusole, ra thoma ngau humbula zwauri vhoḓa u ṱuṱuwedza vhagudiswa nga ha mabuḓo avho. Ro tou mangala vha tshi thoma u ri fhandekana nga zwigwadagwada vha thoma u ri sedzulusesa." Tshiṅwe tshigwada tshe ra fhandekanwa navho vhovha vho iswa kha phera yau gudela, kule na vhaṅwe vhagudiswa.Vho ḓou wana mafola, dzi rezila, na mbanzhe kha vhaṅwe vhagudiswa. "Ndi he vha thoma u ri ṱhasela, vha tshi shumisa tsimbi dza mabannda, na solo dza zwienda. Vho ita na urwa vhaṅwe vhagudiswa. Asi vhoṱhe vhagudiswa vhe vhavha vhe na milandu fhedzi avhango sedza, vhaṅwe vho ṱhaselwa ngauri vhovha vha songo ambara yunifomo yo fhelelaho," a amba.
Uya nga mugudiswa, vhaṅwe vhaṱhannga vhe vha ṱhaselwa vho humbela u iswa vhuongeloni nga murahu hau ṱhaselwa, fhedzi Vho Ravele vha hana khumbelo iyo. Vhagudiswa vhe vha ṱhaselwa ndi vha mirole ya vhufumi u swika ya vhufumi-na-vhuvhili.
"Na ṋamusi ndi tshe na matsivha au ṱhaselwa muvhilini wanga. Ri khou ṱoḓa uri ṱhoho ya tshikolo vha fhindulele zwe zwa itea kha rine. Vhanna vhe vhari ṱhasela asi miraḓo ya SANDF. Vhaṅwe vhavho vho oliwa mivhili nga dzi inki hone vhovha vho ambara dzi rinngi nnzhi zwanḓani," a amba. O engedza zwauri ṱhoho ya tshikolo vho amba zwauri vhanna avho vha bva Bulugwane.
Musi vha tshi vhudziswa nga ha zwe zwa ita, ṱhoho ya tshikolo na vha khoro mbusi ya tshikolo vho hana na fhindula nga tshiwo itshi.
Vho Mosebjane Kgaffe, vhane vhavha mulangi mufareri kha zwa vhudavhidzani kha muhasho wa pfunzo Limpopo, vho fhindula zwauri sa muhasho vha nga khwaṱhisedza zwauri Vho Ravele a vhango vhidza zwigevhenga uri vhaḓe u ṱhasela vhagudiswa.
"Vho Ravele vho shumisa tshiteṅwa 8A tsha milayo ya zwikolo zwa Afrika Tshipembe, tshine tsha vha tendela uri uri vha vhidze vhathu kana muthu uri aḓe u sedzulusesa vhagudiswa. Fhedzi rine sa muhasho, ri hanedzana nau ṱhaselwa ha muthu muṅwe na muṅwe," vha amba. Vho Kgaffe vhari vha khoro mbusi vho ambedzana na vhabebi na vhagudiswa.
Tshiteṅwa tsha 8A tsha milayo ya zwikolo tshi amba nga hau ḓisa zwihali na zwidzidzivhadzi zwikoloni ha vhagudiswa, fhedzi atshi ambi nga ha u shumiswa ha miraḓo ya nnḓa ha tshikolo uri vha kaidze vhagudiswa avho. Ngeno tshiteṅwa tsha vhufumi tshi tshi thivhela u kaidzwa nga nḓila dzo kalulaho zwikoloni hone tsha amba zwauri ahuna muthu ane a fanela u shumisa zwiito izwo zwikoloni u kaidza vhagudiswa.
Muunḓi wa muṅwe wa vhagudiswa vho amba zwauri vhapfa vha songo fariwa zwavhuḓi sa vhabebi na vhaunḓi hu tshi vhidzwa vhathu vha nnḓa uri vhaḓe vha songo amba na vhabebi. "Ro vhaisala nga zwe zwa itea kha vhana vhashu. Sa vhabebi ri fanela uya kha Vho Ravhele, uri vha kone u ṱalutshedza zwauri tshipikwa tsha zwiito izwi. Ahuna zwe vhulangi ha tshikolo vha davhidzana na rine nga hazwo ubva tshe tshiwo itshi tsha itea," vha amba. Vho ombedzela zwauri avha tendelani na u shumiswa ha zwikambi na zwidzidzivhadzi hone vha tenda uri sa tshikolo vha fanela u kaidza, fhedzi maitele aya o khakhea sa izwi zwo sia vhagudiswa vho vhaisala namani na muyani.