Tshiṱori nga: Victor Mukwevho. Thalutshedzo nga: Khathutshelo Raliphaswa.
Vhege mbili dzo fhiraho, vha tshikolo tsha nṱha tsha Tshivhase vho fara muṱaṱisano wa Eskom Expo ya vho rasaintsi vhaṱuku, he ha swika vhagudiswa vha fhiraho vha ḓana u bva kha zwikolo zwa u fhambanaho zwa vhupo ha Vhembe. Wovha wo farwa sa ṱano ḽa ridzhini, ḽine ḽa vha ḽa ndeme kha u alusa na u pembela lutamo lwa vhagudiswa kha saintsi, u sika na vhutsila vhukati ha mihumbulo miṱuku.
Mulangi wa ṱano iḽi ḽa saintsi ya ridzhini ya Vhembe ya Eskom Expo, Vho Ndifelani Phalanndwa, vho ṱahisa vhundeme ha muṱaṱisano kana ṱano iḽi kha vhagudiswa, sa izwi vhagudiswa vho wana tshikhala tsha u sumbedzisa mishumo yavho na zwine vhavha vho tumbula. Vhagudiswa vha swikaho maḓana mavhili vho dzhenelela nga u isa mishumo yavho. "Vhagudiswa avha vho sumbedza u ḓi nekedzela nga u shuma lwa dzi awara nnzhi vha tshi sedzulusa, izwi zwi touvha ṱhuṱhuwedzo vhukuma," vha amba.
Hu na maṱano a furaru-raru ane a ḓo farwa u mona na mavunḓu a fhano Afrika Tshipembe. Muhaṱuli muhulwane, Vho Simon Mathebe, vho ṱuṱuwedza vhe vha kundiwa nwaha uno, uri vha songo nyama hone vha thome u shuma hu tshe na tshifhinga uri vha kone u shuma zwavhuḓi kha miṱaṱisano ya ṅwaha u tevhelaho.
Muimeleli wa u bva kha muhasho wa pfunzo tshiṱirikini tsha vhubvaduvha ha Vhembe, Vho AR Lukhwa, vho ṱahisa ndivhuwo kha vha Eskom nga u lambedza muṱaṱisano uyu, vha tshi dzhiela nṱha mushumo wavho wa u alusa na u tumbula vhukoni ha vhaswa uri vha kone uvha vho rasaintsi vha khwine kha shango ḽashu.
Vhagudiswa vha malo vho pfufhiwa lwa tshipentshele kha muṱaṱisano uyu. Vhagudiswa vhe vha pfufhiwa nga zwipikara ndi vhatevhelaho:
Wa musidzana wa khwine: Mutshidzi Mudau na Rotshidzwa Mudau vha tshikolo tsha Dimani Agricultural.
Wa muhumbulo wa khwine:Zwavhudi Mandiwana u bva Thengwe na Millicent Rantete u bva tshikoloni tsha Kutama.
Wa mushumo wa enedzhi wa khwine: Ankonisaho Singo na Maduvha Mulaudzi u bva tshikoloni tsha Tshivhase.
Wamushumo wa mveledziso ya khwine: Thendo Mpho Lukwareni na Murangi Siphoro u bva Mbilwi.
Vhagudiswa vha funna-malo vho wana mendele dza bronze, vha sumbe vha wana mendele ya siḽivhere, ngeno vha sumbe vho pfufhiwa mendele ya nthesa ya musuku. Vhagudiswa vha zwikolo zwa Dimani na Mbilwi vho pfufhiwa u fhira zwikolo zwoṱhe.
Vhe vha pfufhiwa kha muṱaṱisano uyu vha ḓo wana tshikhala tsha u ṱaṱisano na vhanwe vhagudiswa u mona na shango nga ṅwedzi wa Tshimedzi. Vha ḓo sumbedzisa mishumo yavho na tsedzuluso dzavho kha maṱano a u mona na ḽifhasi ane a farelwa United States ya America, Asia, Europe, na u mona na dzhango ḽa Afrika.