Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Muimbi a ḓivheaho Cyria Tshipateni, ane vhatevheli vhawe vha mu ḓivha nga ḽa Cyria The Community, uri o ḓi lugisela vhukuma uya kha vhuṱambo ha vhuṱahe ha Phalaphala FM Royal Heritage. Vhuṱambo uvhu vhu ḓo farelwa Royal Gardens Nandoni nga ḽa fumi-na-ṱhanu Khubvmedzi.
Vhuṱambo uho hu ḓo mvumvusa vhathu nga vhaimbi vha fanaho na Cyria The Community, Zozo, Sengere, muimbi wa Zimbabwe Leonard Zhakata, Makhadzi, Ramuzika wa rege Colbert Mukwevho, u tou bula vhaṱuku kha vhanzhi.
Cyria uri vhuṱambo uhu ndi ha ndeme kha buḓo lawe ḽa uvha ramuzika, uri: "Ro ḓi lugisela vhukuma vhuṱambo uhu. Zwa zwino ndi khou ḓi lugisela, hone ndi ḓo awela lwo linganaho hu sa athu u swika ḓuvha ḽihulwane. Ndi ḓo mvumvusa vhatevheli vhanga nga nyimbo dzine vho no ḓi dzi thetshelesa na u dzi takalela, nda inga nga u vha ṋea nyimbo dzanga ntswa dzine nadzo vha sumbedza u dzi takalela."
Vho Divhambele Mbalavhali, vhane vha vha muambeli wa vhuṱambo ha Phalaphala FM Royal Heritage, vho ṱahisa uri hu na u khinifhadzwa ho sedziwa tsireledzo ya vhathu, na nḓila ine vhathu vha ḓo dzhena ngayo zwi tshi vhambedzwa na vhuṱambo ha murahu. Vhari vhuṱambo uhu vhu ḓovha ha khwine, hone vhaimbi vha ḓo mvumvusa vhathu nga nḓila ya maṱhakheni.
Vhathu vha khou kaidzwa uri vha songo renga dzi thikhithi dzi songo khwaṱhisedzwaho sa izwi dzi ngasi ṱanganedzwe vhuṱamboni.
Sa nḓila dza u alusa na u kunguwedza vhuṱambo uvhu, vha Phalaphala FM Royal Heritage vho lugisela uya fhethu ho fhambanaho hu fanaho na Tshaulu Butsharani, Tshaulu, Hababa vhuponi ha Rambuda, Exclusive Chillas ire Vuwani, The Force ire Musina, na Muswodi. Kha u dalelwa ha fhthu afho, hu ḓovha na vhane vha ḓo neiwa thikhithi dza vhuṱambo uvhu.
Nyendo ubvela phanda dzo dzudzanywa nga nḓila i tevhelaho:
1 Khubvumedzi – Mountrider ire Budeli.
2 Khubvumedzi – Grovani ire Hamalamulele.
8 Khubumedzi – Dar Es Salaam ire Tshikhudini.
9 September – Newscafe ire Thohoyandou.
14 Khubvumedzi – Migeroni ire Thohoyandou.