Tshiṱori nga: Elmond Tshikhudo. Ṱhalutshedzo nga: Khathutshelo Raliphaswa.
Nga ḓuvha ḽa u ṱhogomela vhupo Vhembe kha muhasho wa zwa vhulimi, Vhamusanda Vho-Philamisevhe Dzivhuluwani Ramalivhana vha Makwarani nnḓa ha Ṱhohoyandou vho huwelela vhadzulapo vha Maṱangari uri vha ḓi dzhenise vhukuma kha u lwa na u tshinyadza mavu, vha iledza vhadzulapo uri vha songo lima kha mavu a songo fanelaho. Mushumo uyu wo farelwa mudavhini wa tshikolo tsha fhasi tsha Makwarani nga Ḽavhuṱanu, 10 Ṱhafamuhwe.
Vhukati ha vhathu afha hovha hu na vhaḓivhi vha bvaho kha muhasho wa Mveledziso ya Ikonomi, Vhupo na Vhuendelamashango (LEDET) vha vunḓu ḽa Limpopo, Vho-Micheal Netshivhodza, Vho-Mboswobeni Mankhili, Vho-Thivhavhudzi Gloria Nekhavhambe na Vho-Muofhe Masutha vhe vha eletshedza nau nea nḓivho ya vhuṱhogwa kha vhalimi na vhadzulapo.
Vho-Lerato Prudence Nenweli vhane vhavha mueletshedzi wa vhulimi kha vhupo uho vhari nga kha u dzulela u davhidzana havho na vhadzulapo vha vhupo uhu, vho limuwa uri huna tshinyalelo ya mavu kha vhupo uhu. "Vhunzhi ha vhalimi vha khou lima thavhani zwine zwa swikisa kha u kumbiwa ha mavu musi mvula i tshi na. Izwi zwo itwa ngau shaya nḓivho ha vhalimi, ro vhona uri ndi zwa vhuṱhogwa uri vhaḓivhi vha zwa vhulimi vha ḓe u eletshedza vhalimi avha," ndi zwe Vho-Nenweli vha amba nga murahu ha u vhona tshinyalelo ine yavha hone nga nḓila ine vhalimi vha vhupo uho vha lima ngayo.
Huna mbekanyamushumo ya uḓi nekedzela ine ya ṱuṱuwedza vhaswa uri navho vha tsireledze vhupo. Ndi mbekanyamushumo ine ya gudisa vhana vhaṱuku nga ha vhupo na nḓila ya khwine ya u ṱhogomela vhupo. "Ri fulufhela uri vhathu vha ḓovha na mbonelo ya khwine kha vhupo havho nga murahu ha mushumo uyu," vha ralo.
"Zwithu zwo no shanduka hone ahuna ndango kha zwisi zwashu. Vhane vha ri tshinyadzela vhupo na muya washu ndi vhathu vhane vha bva Ṱhohoyanḓou na Makwarela sa izwi vha tshi shumisa zwisi zwashu u laṱela malaṱwa avho u fana na maḽeiri a vhana o shumiswaho zwine zwa sia lwefha kha mivhundu yashu. Ri humbela masipala uri vha lange zwine zwa khou itea sa izwi zwi songo fanela. Ra eletshedza vhathu uri vha ṱutshele u lima kha mavu ane a hango fanela, ri tshi itela vhupo hashu," hu amba Vhamusanda Vho-Ramalivhana nga usa fushea havho hau tshinyadziwa ha mavu a mivhunduni.