Translated by Khathutshelo Raliphaswa
Vhadzulapo vha kusi kwa Tshikambe vho fhedza minwaha minzhi vha sina Vhamusanda zwi tshi tevhela u dzama ha Vhamusanda Vho-Wilson Kutama Ratshibvumo Mphaphuli nga ṅwaha wa 2019. Nga dakalo fulu kha vhathu vha Tshikambe ono touvha mafhungo a kale sa izwi hu tshi khou rwelwa rari Vhamusanda.
Nga mugivhela, vhadzulapo, dzi ṱhama na vhaeni vho vha na guvhangano ḽihulu fhaḽa mudavhini wa tshikolo tsha fhasi tsha Tshikambe Primary School hu tshi vheiwa Vhamusanda Vho–Godfrey Vhutshilo Kutama Mphaphuli.
Mphaphuli (42) vhane zwa zwino vha vhidziwa nga dzina lauri Vhamusanda Vho-Ntikedzeni. Hone vho rwelwa tari na khadzi yavho Vho-Lufuluvhi Kutama Mphaphuli, na ndumi yavho Vho-Nyambeni Kutama Mphaphuli.
Munwe wa vhaeni ovha e muḓivhalea u mona na ḽifhasi Vho-Bishop Elijah Maswanganyi, mudzula tshidulo wa tshiimiswa tsha mahosi tsha Afrika Tshipembe fhano Vhembe Vho -Dokotela Prince Gulukulu Mathebula, mahosi na vhafunzi uya nga zwivhidzo fhano Vhembe,
Nga iḽo ḓuvha, Thovhele Vho-Gole Mphaphuli, vhane vha khosi wa govha la Ha- Mphaphuli, vha pfa vho rulea uri, u fhirisa u lwela vhuhosi unga kha minwe miṱa, Vho-Mphaphuli vho rwela tari murangaphanḓa hu sina dzi nndwa na dzi khakhathi muṱani. Vhari vha takalela u vhona Vhamusanda vha tshi thakha vhathu vhane vhavha rangaphanḓa nga ṱhonifho hone ngau lingana.
"Vha ṱhogomele vhathu vhavho nau vhea mudzimu phanḓa. Mudzimu ane ra mu losha, phanḓa, zwoṱhe zwavho zwi ḓo dzudzanyea. Kha vhadzulapo – khevha Vhamusanda vha vheiwe vhane vho neiwa maanḓa a uni rangaphanḓa, ni vha ṱhonifhe hone ni songo vha retshela zwikwekwe. Ndi muthu, vha fana na vheiwe," vha ralo Vho- Mphaphuli.
Mudzula tshidulo tsha muḓi wa musanda Ha-Tshikambe, Vho-Norman Munyangane, vhari vha ḓo tikedza bono ḽa Vhamusanda Vho-Ntikedzeni.
Vhamusanda Vho-Ntikedzeni vho ṱanganedza vhuḓifhinduleli nga vhuthu. "A thi dzhieli fhasi vhuḓifhinduleli he nda hweswa hone. Ndi khuliso ine ya ḓa na vhuḓifhinduleli. Mveledziso ndi yone ine ya ri kunda kha vhupo hashu, ndi ḓo dzula fhasi na khoro ra sedza uri ndi ngafhi hune ra ḓo khwinifhadza nga tshihaḓu.
Tshifhaṱo tsha vhupo kana muvhundu ndi zwinwe zwa mishumo ine ya ḓou shumiwa nga tshihaḓu, ri humbela thuso u bveledza hoyu mushumo sa mushumo wanga wau thoma sa Vhamusanda. Vhalanda vhanga vha fanelwa nga zwinzhi, ndi ḓi imisela u shuma nau ḓisa mvelaphanḓa kha kusi uku. Vhadzulapo vha fanela u ḓipfa vha na murangaphanḓa, ra farana ri nga zwi kona," vha zwa ngauralo.