Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Fhasi ha Mailausumbwa Kennedy Tshivhase huna Vhamusanda vhasi gathi vha vhafumakadzi, nga Mugivhela wa ḽa gidi mbili fumbili ṱahe Lambamai, kha kusi kwa Matondoni Ha-Sengani nnḓa ha Ṱhohoyanḓou, ho ḓadzwa mativha nga mukololo Phophi Maria Sengani wa minwaha ya fuiṋa ṱahe sa mufumakadzi wau thoma uvha vhamusanda kha kusi uko.
U bva nga ṅwaha wa gidi mbili fumi malo hu tshi dzama Khosi Vho-Khaukanani Davenet Sengani, Kusi kwa Matondoni kwo vha ku sina vhamusanda. Vhuhosi ha kusi uku ho lwelwa nga vhanzhi u bva ṅwaha wa gidimbili fumi malo Khosi i tshi dzama zwa sina hu sina vhulangi ho teaho hone hu sina mveledzisokha kusi uku, u vhuya u swika zwino.
Mativha o ḓadzwa musanda wa Matondoni he maḓana a vhathu vha kuvhangana, Meyara wa Thulamela Vho-Sarahy Rammbuda, mahosi fhasi ha vhulangi ha Tshivhase, mashaka na vhadzulapo.
Vhamusanda avha vho ṋewa dzina ḽa Vhamusanda Vho-Mukonanyi. Vho-Mpho Sengani vho vheiwe sa ndumi, ngeno Vho-Aluwani Sengani vho vheiwa sa khadzi.
Vho-Mailausumbwa Tshivhase vhari Vhamusanda Vho-Mukonanyi vho vheiwe vhuhosini sa izwi mulayo u tshi tenda vhafumakadzi vha tshi vhusa. "Hu fanela u itwa nyito kha maipfi ane vhathu vha dzulela u amba nga ha u maanḓafhadza vhafumakadzi nau vha ṋea vhuimo ha nṱha. Ndi zwine ra khou ita ngeno Ha-Tshivhasa, rina vhafumakadzi vhanzhi vhane vha khou rangaphanḓa kha zwisi zwinzhi. Ndi huwelela vhadzulapo uri vha tikedze vhamusanda wavho uri kusi kwavo kuvhe na mveledziso," vha zwa.
Vhamusanda Vho-Mukonanyi vhari vho ḓi lugisela u shandukisa zwithu. "Vhathu vhashu vho ṱahelelwa nga tsumelo ine yavha ṱhoḓea lwa tshifhinga tshilapfu nga nndwa dza miṱani. Zwa zwino ri khou bvela phanḓa, ro vhea nungo dzashu kha u ḓisa mveledziso kha kusi kwashu. Sa izwi vhaswa vhanzhi vha tshi ḓi dzhenisa kha zwa zwidzidzivhadzi, ri ṱoḓa uvha bvisa zwiṱaraṱani nga uvha ṋea fhethu hune vha ḓoya u guda zwikili na mitambo," vha zwa.
Vho-khotsimunene Vho-Nnditsheni Themeli vhovha vho takala vhukuma. "Ro tambula hu sina vhamusanda. Heli ḓuvha rovha ro ḽi lindela, ho tibulwa gole ḽe ravha ri naḽo. Ri ḓo tikedza vhamusanda vhashu," vha amba.