Tshiṱori nga: Victor Mukwevho. Ṱhalutshedzo nga: Khathutshelo Raliphaswa.
Vhamusanda vha kusi kwa Tshidimbini, Vhamusanda Mulingoni Eric Tshivhase, vhe vhavha vha tshi ḓivhiwa khwine nga ḽa "Rambo" nga hone uvha na vhukoni kha mitambo yau fhambana, vho dzama nga Mugivhela wa ḽa fumi-na-raru Lambamai.
Muambeli wa muṱa, Vho Khotsimunene Vho Avhakholwi Tshivhase, vho amba kha nyambedzano yavho na vha Limpopo Mirror vho amba zwauri Vhamusanda Vho Tshivhase vho dzama nga murahu ha u lwa na biso lwa tshifhinga tshiṱuku vhe na minwaha ya fuṱhanu-raru. "Roṱhe ro vhaisala nga u dzama havho shangoni, hone na vhadzulapo vha muvhundu washu vha khou lila na rine vha muṱa. Ubva ḓuvha ḽe zwa ḓivhadziwa vhathu, ri khou wana thikhedzo nga nḓila dzoṱhe dzine vha kona u fana na thabelo dzine vha khou ḓisa ḓuvha ḽiṅwe na ḽiṅwe kha tshifhinga itshi tshi konḓaho," vha amba.
Kanzhi, musi murangaphanḓa wa sialala vha tshi dzama, vhalanda vha sala vha si na vhurangaphanḓa lwa miṅwedzi kana minwaha mativha a sa athu u ḓadzwa. Fhedzi Vho Avhakholwi Tshivhase vhari zwa zwino kha muvhundu uyu zwo fhambana.
"Sa muṱa wa ha Tshivhase, Thovhele vhashu, Thovhele Vho Kennedy Midiyavhathu Tshivhase, vha khou rangaphanḓa kusi kwa Tshidimbini zwa zwino. Musi ri na Mailausumbwa kha vhurangaphanḓa, ri tenda khauri zwithu zwoṱhe zwi ḓo dzula zwi ngonani kha kusi kwashu," vha amba.
Munnaavhane Vhamusanda Vho Tshivhase vhovha vha khou rangaphanḓa mivhundu mivhili nga khathihi. Vhovha vhe murangaphanḓa na kha kusi kwa Mandala. "Vhathu vha khou isa na maipfi a ndiliso kha kusi kwa Mandala. Vhurangaphanḓa havho na nḓila dzau kona u sea na Vhathu ndi zwithu zwine ra ḓo dzulela uzwi elelwa nga havho na kha lutsinga lwa Tshivhase," Vho Avhakholwi Tshivhase vha amba
Munnaavhane vhovha vhe mutambi makone wa mutambo wa bola ya milenzhe musi ula, vha tshi ḓivhelwa uvha muṅwe wa vhatambi makone vha tshidivhea hothe. Vho tambale thimu ya vhupo havho, ya Tshidimbini Brave Lions. Vho dovha hafhu vha tambela na thimu ya Khubvi Peace Makers na ya Ngwenani Manchester United.