Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Nga murahu ha vhege ho wanala masalela a Vhamusanda khilomithara dzi si gathi ubva hayani havho, vha muṱa vha khaḓi kundelwa u ṱanganedza hone vha na dzi mbudziso nga ha u dzama havho. Vha khou kundelwa u tenda zwauri Vhamusanda Vho tou ḓi haṱula vhutshilo.
Vhamusanda Vho Maṱodzi Nthakheni Ramabulana (50), vha Khakhanwa Mulenzhe, nnḓa nyana ha Ṱhohoyanḓou ndi vhe vhavha vho ngalangala nga Mugivhela wa ḽa mbili Ḽara, he vha fhedzisela u vhonala nga matsheloni ayo nga awara ya vhuṱanu nga matsheloni.
Musi vho kundelwa u vhuya hayani, vha muṱa khathihi na vhadzulapo ndi vhe vha thoma fulo ḽau zwimana navho fhedzi zwisi anwe mitshelo. Vho ita nau tevhela zwinzhi zwe zwa ambiwa, fhedzi vha si vha vhone.
Nga murahu ha maḓuvha a fumi, nga Ḽavhuna, ḽa fumi-iṋa Ḽara, masalela avho o ḓou waniwa masimuni a tsini na hayani havho. Mudzulapo wa tsini, ane ovha a tshi khou zwima fhethu afho, uri o tou vhona tshitumbu tshi fhasi ha muri. Vhamusanda Vho Ramabulana vhovha vhe na tshipiḓa tsha thambo ya muḓagasi kha mukulo, ngeno hovha hu na tshiṅwe tshipiḓa tsha thambo iyo yo vhofhiwa kha muri.
Vhunzhi ha vhathu avha tendi zwauri Vhamusanda vho tou ḓi haṱula vhutshilo, zwihulu vho sedza zwauri fhethu afho hu ḓivhelwa mabulayo a zwau itwa zwiṱhavhelo nau ngalangala hu sa pfesesei. Na vha muṱa wa musanda vho ṱahisa zwauri vha na zwine vha khou timatima nga ha u dzama ha Vhamusanda Vho Ramabulana.
Khaladzi a Vhamusanda, Vho Makhadzi Vho Tshililo Onica Ramabulana, vho amba zwauri vhovha vho lindela uri mapholisa vha bvele phanḓa na ṱhoḓisiso dzavho na mvelelo dza u ṱola tsho ḽaho mufu uri dzi bviselwe khagala. "Vhunzhi ha dzi mbudziso dzi tshe mihumbuloni yashu malugana na fhungo heḽi ḽau ngalangala ha Vhamusanda na u dzama havho. Zwine zwa tou nanisa u vhilaedza ndi vhukule ha he vha wanala hone. Fhethu hafho ndi mithara ṱhanu ubva hayani havho, lune ari tou kholwa zwavhuḓi uri vho swika hafho nga vhone vhane. Ri tenda zwauri vho tou isiwa hafho he vha wanala hone vho no dzama," vha amba.
Vho engedza zwauri u dzama ha Vhamusanda zwi ḓo dzulela uvha tshilonda khavho na kha vha muṱa ngau angaredza.
Muambeli wa mapholisa kha tshiṱiriki tsha Vhembe, W/O Vuledzani Dathi, vho khwaṱhisedza tshiwo, vha amba zwauri ho vulwa na mulandu wau ṱola tshivhangi tshau dzama ha Vhamusanda. "U swika zwino, ahuna na muthu na muthihi ane a ḓivhi uri ho itea mini kha Vhamusanda, fhedzi vho wanala vhe na thambo ya muḓagasi kha mutsinga wavho," vha amba. Vho wanala fhasi ha muri he vhovha vho vhofhiwa nawo, ngeno tshiṅwe tshipiḓa tsha thambo iyo tshovha tshi tshe tsho vhofhea kha muri. Zwi vhonala thambo iyo yo tou swika kha he ya khathuwa. "Ri dovha hafhu ra humbudza vhadzulapo uri vha vhee mafhafhu fhasi vha tende mapholisa vha tshi ita mushumo wavho kha mulandu uyu," hu amba Vho Dathi.
Nga tshifhinga tsha musi tshiṱori itshi tshi tshi anḓadzwa, nzudzanya dzau swiṱiwa dzovha dzi kati fhedzi dzisa athu u fhela, fhedzi u swiṱiwa havho ndi hune ha khou lavhelelwa u farwa nga Lavhuṱanu ḽa fumbili-mbili Ḽara.