Tshiṱori nga: Silas Nduvheni. Ṱhalutshedzo nga: Khathutshelo Raliphaswa.
Kha milayo yo tiwaho ya thengiso ya mahalwa vunḓuni ḽa Limpopo, na zwifhinga zwa u rengisa, milayo iyo i kwama na vhane vha tou ṱomba halwa a silalala mahayani avho. Vhaṱombi vhoṱhe vha mahalwa vha fanela uvha na thendelo dza u rengisa halwa vhune vha tou ḓi ṱombela vhone vhane hayani vha rengisa.
Milayo iyo ye ya vheiwa nga vha Muhasho wa Limpopo wa mveledziso ya ikonomi, vhupo na vhuendi (LEDET), yo thoma u shuma nga ḽa u thoma ḽa Ṱhangule. Kha manwe mavunḓu, milayo i fhungudza zwifhinga zwa thengiso ya mahalwa dzi thavene, na mavhengele au ḽela u bva kha awara dza maḓautsha uya kha awara ya vhufumi mbili vhukati ha vhusiku. Tshanduko idzo dzo vhetshelwa u lingedza u fhungudza nḓila ine vhathu vha shumisa ngayo halwa, na u ṱuṱuwedza vhathu uri vha ṅwe halwa mahayani uri vha vhe vho tsireledzea kha vhutshilo ha vhusiku.
Vha thengiso ya mahalwa ya lushaka, dzangano ḽine ḽa imelela vharengisi vha mahalwa fhano Afrika Tshipembe, vho dzhia maga a mulayo au hanedzana na u vheiwa ha milayo iyo. Vhovhiga mbilaelo dzavho kha vha khothe khulwane ya Bulugwane vha tshi lingedza u thivhela u vheiwa ha milayo iyo.
Nga Lavhuvhili ḽa malo Ṱhangule, vharengisi vha mahalwa vha tshivhalo vho ya u thetshelesa khothe, vho tikedzwa nga vhashumisani vha bvaho Gauteng na Mpumalanga. Fhedzi vha khothe khulwane vho fhirisela khothe phanḓa u swika ḽa fumi malo, zwi tshi tevhela u iswa ha mivhigo ya u tikedza a vha ḽihoro ḽa Economic Freedom Fighters (EFF). Vhatikedzi vha EFF, vhaimbi, na vhanwe vha u bva kha nḓowetshumo ya vhumvumvusi vhovha vhe hone kha khothe iyo.
Mudzudzanyi wa vharengisi vha mahalwa, Vho-Lucky Ntimane, vho ṱahisa uri mulayo uyu u do humiselwa murahu. Vhari, "Ri ṱhonifha mvelele dza khothe, dzine namusi dzo sedzana na milayo iyi, hone vha fulufhela uri u isa mbilaelo dzavho zwido ṱuṱuweza vha milayo ya thengiso ya mahalwa uri vha iledze u shumisa milayo iyo."
Vho-Humbulani "Mpfinyapfinya" Netsianda, muṱombi wa mahafhe u bva kusini kwa Malamangwa-Tshamasidela, vho hanedzana na milayo iyi ine vha khou vhetshelwa. Vhari vhathu vha vhupo ha mahayani vha khou ṱomba mahalwa uri vha kone u kunda vhushai na usa wana mishumo. "Nne ndi ṱomba mahafhe ndi tshi tevhedza zwe mme anga vha npfunḓedza, hone milayo iyi i ḓo kwama mabindu ashu nga nḓila isi yavhuḓi. Vhupo ha mahaynai ri na dzi khaedu dza u wana zwishumiswa, u wana thendelo dza u ṱomba mahalwa zwi ḓovha khaedu kha sia ḽa masheleni kha rine," vha amba.