Tshiṱori nga: Thembi Siaga. Ṱhalutshedzo nga: Khathutshelo Raliphaswa.
Vharengisi vha zwimauswu vhane vha shuma fhala mavhengele tserekano Hubyeni, Elim, vha kha ḓi lila zwi tshi tevhela u swa ha zwimauswu zwavho. Mulilo uyo we wa nenga wo sia ho swa zwifhaṱo, zwirengiswa na zwishumiswa. Hone tshivhangi tsha mulilo uyo we wa nenga nga madekwana a Ḽavhuna ḽa fumbili-malo Khubvumedzi a tshi ḓivhei zwa zwino.
Vhe vha zwi vhona nga maṱo, vha vhiga u swa uho, vhari vho vhona mulilo u tshi duga nga luvhilo luhulu zwe vharengisi vha balelwa u phulusa zwirengiswa zwavho. Naho vho lingedza u rwela vha zwidzima mulilo vha Vhembe nga ṱhingo, vhori vha tshi swika vha wana zwimauswu na zwibveledzwa zwo swa lore.
Munwe wa vharengisi vha zwimauswu, Vho Rosina Ngobeni, vhari vho ṱanganedza ṱhingo nga madekwana nga awara ya vhusumbe vhe hayani vha tshi vhudzwa uri zwimauswu zwi khou swa, ndi he vha fhedza vho gidimela mavhengele tserekano a Hubyeni sa izwi vhovha vho sia ṅwananyana wavho tshimauswuni tshavho. "Ndi tou livhuwa uri ṅwananyana wanga o tsireledzea, fhedzi zwine zwoṱhe zwo swa ḽore," vha amba.
Zwine zwa vhaisa vharengisi avha zwihulu ndi uri a vha ḓivhi tshivhangi tsha mulilo. Vharengisi vha khou humbulela vhashumisi vha zwidzidzivhadzi sa izwi vhege dzo fhiraho vho ḓa vha ṱangula zwimauswu zwavho.
Vho Julia Madaba, mudzulatshidulo wavharengisa vha mimakete ya Elim, vhari tshinyalelo i khou anganyelwa u vha ya tshigidi tshithihi na maḓana a rathi wa dzi rannda. "Zwine zwa vhilaedzisa ndi uri vhathu vhori vha tshi vhona mulilo uyo, vha si lingedze u thusa, fhedzi vha vha vha khou kandisa dzi vidio na u dzhia zwifanyiso," vha amba.
Tshiwo itshi ndi tshine tsha humisela vharengisi murahu, ri tshi sedza masheleni e vha a shumisa u alusa zwimauswu zwavho hu u itela u unḓa miṱa yavho. Vha khou humbela thuso uri vha kone u lugisa tshinyalelo ya tshiwo itshi.