Tshiṱori nga: Kaizer Nengohela. Ṱhalutshedzo nga: Khathutshelo Raliphaswa.
Vharengisi vha zwimauswu ḓoroboni ya Tshitandani, Elim, Ha-Sinthumule na Ha-Kutama vhovha vho ḓalelwa nga dakalo vha tshi ṋewa zwishumiswa zwau alusa mabindu avho kha mushumo we wa farelwa Show grounds ngei Tshitandani nga Lavhuvhili ḽa fumbiliraru Shundunthule.
Vharengisi vha swikaho furathi-sumbe vhane vhavha na bammbiri dza thendelo uri vha rengise, vho ṋewa zwishumiswa zwi ngaho zwiṱofu, zwixwatusi, dzi thannga dza maḓi, maṱafula na zwinwe zwinzhi zwine zwa swika masheleni a zwigidi zwa ḓana zwa dzi rannda. Vha muhasho wa mveledziso ya mabindu maṱuku vho ṋea masheleni a swikaho zwigidi zwa maḓana a ṱahe.
Vho-Noko Manyelo, vhane vhavha muhulwane wa nyambedzano kha muhasho uyo, vhari tshipikwa tsha u ṋea vharengisi avha ndi u dzhiela nzhele mushumo une vharengisi vha ita khau alusa ikonomi na uvha thusa u alusa mabindu avho. "Ri ṱoḓa u sikela vhadzulapo mishumo nau vhona mabindu a vhathu atshi aluwa. Ri tenda uri zwishumiswa zwe ravha ṋea zwi ḓo vha thusa u tshimbidza mabindu avho nga nḓila dzo leluwaho," vha amba.
Vho-Manyelo vhari muvhuso wo limuwa uri mabindu maṱuku ndi one ane a alusa ikonomi ya shango lashu. "Vhathu vha dzulela u amba nga mabindu mahulwane vha hangwa nga mabindu maṱuku, u fana na zwimauswu zwine zwa tshimbidzwa fhano. Muvhuso washu ua tikedza mishumo ya vuk'uzienzele. Mabindu maṱuku ndi one ane a alusa miṱa minzhi fhano Afrika Tshipembe," vha amba.
Meyara wa Makhado, Vho-Samuel Munyai, vho ramba vharengisi vha fhasi ha Masipala uri vha ise mbilaelo kana khaedu dzavho dzine vha ṱangana nadzo kha mabindu avho kha muhasho wa mveledziso yo ikonomi. Vhari Masipala u ṱhonifha vharengisi vhane vha alusa mabindu avho, sa izwi hu one mabindu ane avha tshipiḓa tshau alusa ikonomi ya vhupo ha Makhado.
Munwe wa vharengisi, Vho-Mathakha Raphunga, vhari vho ḓalelwa nga dakalo nga zwishumiswa zwe vha neiwa, hone vha lavhelela uri vharengi vha do engedzea. "Ndovha ndi tshi kundelwa u tshimbiza bindu langa zwavhuḓi ngau shaya zwishumiswa zwo fanelaho. Zwa zwino vharengi vhaa kona u thusalea khwine."