Tshiṱori nga: Vhabveleli. Ṱhalutshedzo nga: Khathutshelo Raliphaswa.
U awela mushumo muthu a sala a sina zwine a ita ḓuvha linwe na linwe ndi zwine zwa sika u bvafha na vhulundu kha vhanzhi. Vho Lufuno Ratshilumela Dzebu vha bvaho Khubvi vho ri u vhona vha sina zwinzhi zwine vha ita sa izwi vho awela mushumo vha thoma zwa vhulimi. Vho thoma vhulimi uhu hu nḓila ya u ḓi thusa u dzulela uvha na nungo na u ḓi unḓa.
Vho Dzebu vha shuma tsimuni yavho vhe vhoṱhe, hu sina ane a vha thusa. Tsimu yavho i wanala tsini na mulambo wa Mbwedi. Vha dzulela u shuma tsimuni yavho ḓuvha ḽinwe na ḽinwe. Zwimedzwa zwavho zwi katela u ṱavha miroho ya u fhambana, na u fuwa dzi khuhu, nguluvhe na dzi mbudzi.
Vho Dzebu vhovha vha tshi shuma sa mueletshedzi wa u laṱa mathukhwi masipala wa Thulamela. Vhori u awela mushumo nga ṅwaha wa 2018, vha thoma u ṱavha zwimedzwa dzharaṱani yavho. "Ndo swika he nda balelwa u wana tshifhinga sa izwi ndovha ndi tshi shuma ngadeni yanga matsheloni a ḓuvha ḽinwe na ḽinwe. Nga one mashudu mavhuya a uvha mudzulapo a fulufhedzeaho, vhamusanda vha kusi kwanga vho mbo ḓi nṋea mavu o linganelaho a u shumela vhulimi hanga khao. Izwo zwo nthusa sa izwi ndo konou ṱavha zwimedzwa zwine kale ndovha ndi tshi tou renga u unḓa muṱa wanga. Ndo no limuwa uri vhulimi ndi yone thikho ya matshilo ashu, zwihulu ro sedza na ikonomi ya shango lashu zwino. Vhaswa vha fanela u ṱuṱuwedziwa uri vha dzhie buḓo la vhulimi," vha amba.
Vha tenda khauri vhathu vho awelaho mishumo vha fanela u ḓi wanela zwine vha ita na u bveledza tshifhinga tshoṱhe. Uya nga havho, tshivhanga tshihulwane tsha uri vhathu vhanzhi vhavhe na thaidzo dza mitakalo ndi u shaya zwine vha ita, vha ṱwa husina zwine vha ita. "Ndi hune vhathu vha dzhenelwa nga malwadze nga u shaya zwine vha nga ita, mivhili yavho i a fhela nungo. Ngeletshedzo yanga kha vhanwe vhane a vha shumi ndi uri vha thome zwimauswu hu u itela u bveledza zwithu na u ḓowedza mivhili uri i si fhele nungo," vha amba.