Tshiṱori nga Victor Mukwevho. Ṱhalutshedzo nga Khathutshelo Raliphaswa.
Vhahwelelwa vha fumi-thihi vhe vha farwa nga Lavhuṱanu ḽa fumbili-malo malugana na u gwa muṱavha kusini kwa Matangari vho ḓi vhonadza khothe ya madzhisiṱiraṱa wa Ṱhohoyandou nga masiari a Musumbuluwo. Vhahwelelwa avho vho ḓi vhonadza khothe nga zwigwada zwa vhararu, vhavhili na vharathi.
Tshigwada tshe tsha thoma u ḓi vhonadza khothe hovha Tshinetise Andries Nemalili na Thilivhali Nyamande, ngeno tshigwada tsha vhuvhili hovha Mulisa Mamafha, Phophi Rambuda, George Salani, Isaack Munyai, Thinavhuyo Mamagau, na Tshimangadzo Rambuda.
Tshigwada tsha vhuraru hovha vhahwelelwa vhane vha khou dovha hafhu u livhanwa na uvha fhano Afrika Tshipembe vhasina ṱhanziela kana thendelo. Avho ndi Tafadza Moyo, Dincent Mudzunga, na Simbarashe Gwedura. Mulandu wa avha vhararu wo ḓou fhiriselwa phanda uya kha Lavhuṋa uri vha nee muvhuso tshikhala tshau khwaṱhisedza vhune havho na vha muhasho wa vhuṋo.
Uya nga muambeli wa mapholisa fhano Limpopo Col Malesela Ledwaba, vhahwelelwa vho farwa vha khou gwa muṱavha kusini kwa Matangari, kha vhupo vhu ha ḓivhelwa uri vhathu vha dzulela u gwa muṱavha zwi siho mulayoni.
Colonel Ledwaba vhari ho thoma fulo ḽau lwa na u gwiwa ha muṱavha zwi siho mulayoni, fulo iḽo ḽovha ḽo vhumbiwa nga yunithi dzau fhambana dza mapholisa, vha SANDF, na vhaṅwe vhe vha shela mulenzhe vha Vala Umgondi, nga murahu hau wana muvhigo nga ha u gwiwa ha muṱavha zwi siho mulayoni he vha vha wana vha khou hwala mutavha.
"Miraḓo ya fulo iḽo vho ḓou shumisa muvhigo he vha ya afho Matangari. Vho ḓou wana vhathu vha fumi-na-thihi, vhane nga minwaha ndi vha vhukati ha fumi-malo na fuṱhanu-iṋa, vha khou hwala muṱavha vha mbo vha fara na zwenezwo. Ho ḓou dzhiiwa maṱiraka mararu au hwala miṱavha na fosholo dza rathi," vha amba.