Tshiṱori nga Maanda Bele. Ṱhalutshedzo nga Khathutshelo Raliphaswa.
Vhuṱungu ha mme vhu ṱungufhadzaho ho vuswa hafhu mafheloni a vhege nga murahu ha musi vhiḓa ḽa ṅwananyana wawe ḽo ṱhaselwa nga vhahumbulelwa vha sa ḓivhei mavhiḓani a muvhunduni wa Hamavhunga kha vhupo Nzhelele, hure fhasi ha masipala wapo wa Makhado.
Mapholisa vho khwaṱhisedza uri mulandu wa u thithisa mavhiḓa na tshitumbu u fhasi ha ṱhoḓisiso, nga murahu ha u tumbulwa hu thithisaho nga Mugivhela, ḽa 12 Fulwana.
Uya nga muambeli wa mapholisa wa Limpopo Col Malelela Ledwaba, murado wa tshitshavha o kwameaho o tsivhudza muṅwe nga ha tshiwo itsho nga murahu ha u vhona tshigwada tsha vhathu vha sa ḓivhei vha tshi khou gwa mavhiḓani. Musi muraḓo wa muṱa vha tshi swika, vhahumbulelwa vho vha vho no shavha kale.
"Vho wana uri ḽiṅwe ḽa mavhiḓa ḽo vha ḽi ḽo ita nau thithiswa, zwipiḓa zwa bogisi ḽo bviselwa nnḓa," ho amba Vho Ledwaba. "Mapholisa vho ḓou namba vha vhidzwa nahone, musi vha tshi swika, vha wana uri vhukuma vhiḓa ḽo bviswa nahone bogisi ḽo vunḓea."
Vho Mashudu Mudzhiba, mme a mufu, vhari vho sala vho ṱungufhala nga murahu ha musi vho ṱanganedza luṱingo lwa uri fhethu ha u awela ha ṅwananyana wavho ho thithiswa. "Ndo vhidzwa nga Mugivhela nga masiari nahone nda vhudzwa uri ndi ḓe muḓini wa Mavhunga," vha ralo. "Ndi bva muvhunduni wa Matanda, ndo mbo ḓi gidimela henefho. Mavhiḓani, vho ntsumbedza vhiḓa ḽa ṅwananyana wanga - ḽo vha ḽo tshinyadziwa. Ndo vhona zwipiḓa zwa bogisi ḽawe."
Ṅwana wavho wa musidzana o vhulungwa nga 2023, nahone muṱa wo vha u kha maitele a u dzudzanya tombo ḽa ṱhoho musi tshiwo tshi tshi itea. "A tho ngo vhuya nda humbula u sedza arali zwoṱhe zwi tshi kha ḓi vha zwo khwaṱha, arali masalela awe oṱhe e hone. Mapholisa vho fheleledza vho vala vhiḓa nga zennge. Ndo vha ndi tshi khou thoma u fhola, fhedzi hezwi zwo sokou ḓisa vhuṱungu na zwihumbudzo zwi ṱungufhadzaho zwa murahu," Vho Mudzhiba vha ralo.
Khomishinari wa Mapholisa a Vundu Vho Lt-Gen Hadebe vho sasaladza zwiito izwo, vha zwi ṱalusa sa "vha shushaho na u thithisaho vhukuma". "Ndo laedza vhaṱoḓisisi vhashu uri vha shumise zwishumiswa zwoṱhe zwi re hone u itela u tevhela vhoṱhe vhane vha vha na vhuḓifhinduleli ha nyito iyi i si na mbilu," vho ralo.
Tshiṱuṱuwedzi tsha u pfuka mulayo wa mavhiḓa a tshi athu ḓivhea. Mapholisa vha khou ṱuṱuwedza muthu muṅwe na muṅwe a re na vhutanzi ane a nga thusa kha u farwa ha vhahumbulelwa uri vha ise mivhigo fhethu ho teaho hu e hu ngavha kha zwiimiswa zwa muvhunduni, vharangaphanḓa vha sialala khathihi na kha zwiṱitshi zwa mapholisa zwa tsini.
Munwe na munwe are na mafhungo o teaho u humbelwa u kwama Sgt Lirovha Mashudu kha 072 943 5260, vha founele nomboro ya Crime Stop kha 08600 10111, vha dalele tshititshi tsha mapholisa tsha tsini, kana u shumisa app ya MySAPS.