Tshiṱori nga: Bernard Chiguvare. Ṱhalutshedzo nga: Khathutshelo Raliphaswa.
Khombo ya bisi ḽa vhashumi vha mugodini wa Venetia Mine vhawela kha limaga la Murrary & Roberts na ṱiraka yo sia vhathu vha swikaho mahumi mavhili vho lovha. Khombo iyo yo bvelela nga masiari a Sondaha ya ḽa fumi-sumbe Khubvumedzi kha gondo ḽa R572 vhukati ha Musina na mugodi wa Venetia. Bisi iḽo ḽovha ḽi khou endedza vhashumi vha mugodi wa Venetia.
"Ri nga khwaṱhisedza uri vhathu vha mahumi mavhili vho lovha kha khombo iyo. Vha fumi-sumbe vhovha vhe vhashumi vha Murray & Roberts, mureili wa bisi ḽa Hope Transport, mureili na munameli wa ṱiraka," hu amba Vho Jardim, muhulwane wa mulanguli wa zwavhudavhidzani kha limaga la Murray & Roberts, kha tshitatamennde tshe vha amba nga masiari a Lavhuvhili. Vhunzhi ha vhathu vhe vha lovha kha khombo iyi vho lovha nga mulilo we wa nanga musi ṱiraka na bisi zwi tshi thulana.
Vhathu vhe vha phuluswa kha khombo iyo ndi vhaṋa fhedzi, musi hu tshi anḓadzwa nga ha khombo, hone vha kha ḓi ongiwa vhuongeleni. Avho vhathu vhaṋa vha kha vhuimo tshifushaho hone vha kha ḓi bvela phanḓa na u wana thuso. Ri vhatamela mashudu mavhuya uri vha ṱavhanye vha fhole," vha engedza.
Madzina a vhathu vho lovhaho a tshe o farwa sa izwi vha khaḓi khwaṱhisedzwa uri ndi vho nnyi na u kwama miṱa yavho. "Ro dzudzanya hune vha miṱa na dzi ṱhama vha nga ri kwama lwa shishi zwi tshi kwamana na khombo iyi i shushaho. Vha nga ri kwama kha 015 575 2524 kana kha 015 575 2906."
Vha Murray & Roberts vhakhou bvela phanḓa na u tikedza vhashumi vhavho. "Ri ḓo dalela miṱa yo dzhakiwaho na uvha nea thikhedzo uri vha kone u swika Musina uri vha khwaṱhisedze arali vho lovhaho hu mashaka avho," vha amba. Vha dovha hafhu vha livhuwa na thikhedzo ine vha khou i wana u bva kha muvhuso wa vunḓu Limpopo na Masipala wa Musina na Blouberg, na tshigwada tsha De Beers tshine vha shumisana natsho.
Vha mahoro a polotiki na vha muvhuso vha khou swikisa milaedzo yavho ya ndiliso. Vha ḽihoro ḽa DA vhari vha muhasho wa vhuendi Limpopo vha fanela u lugisa magondo avho hu u itela uri vhareili na vhaenda nga nayo vha dzule vho tsireledzea magondoni. Nga Musumbuluwo, MEC wa vhuendi na tsireledzo vha Limpopo Vho Florence Radzilani vho dalela he khombo ya bvelela hone uri vha ḓivhe nga he khombo ya bvelela ngayo na u dalela vhalwadze vhare vhuongeloni.