Tshiṱori nga:Elmon Tshikhudo. Ṱhalutshedzo nga: Khathutshelo Raliphaswa.
Kha mulilo we wa taha nḓuni ya muṱa wa ha Baloyi, ho lovha mukalaha vha minwaha ya fusumbe na ṅwana wa minwaha miraru wa mutukana, ngeno mukegulu vha minwaha ya furathi-raru vho huvhala vha hwalelwa vhuongeloni. Tshiwo itshi tsho bvelela Rotterdam, kusi kure vhuponi ha Hlanganani nga Lavhuna ḽa fumi Thangule, nga awara ya vhumalo.
Muraḓo wa muṱa uyu, Vho-David Baloyi, vhari ahuna ane avha na vhuṱanzi uri ndi mini tsho vhangaho mulilo uyo, fhedzi vho khwaṱhisedza uri zwi kwama miṱa mivhili. "Zwine nda nga amba zwa zwino ndi uri sa muṱa ro vhaisala vhukuma nga tshiwo itshi. Tsho swika ri songo lavhelela tsha ri shusha vhukuma. Zwine zwa nanisa u lemela ha tshiwo itshi ndi uri vha muṱa vho xelelwa nga thundu dzavho dzoṱhe vha tou salelwa nga zwiambaro zwe vhavha vho ambara. Ri livhuwa zwihulu kha mukhantselara Vho-Makhekhe Ngobeni vhe vha ri thusa sa muṱa tshe tshiwo itshi tsha bvelela. Thuso iṅwe na iṅwe ine vhathu vha nga kona u ri nea yone ri nga i ṱanganedza.
Tshiwo itshi tsho khwaṱhisedzwa nga Vho-Malesela Ledwaba vhane vhavha muambeli wa mapholisa a vunḓu ḽa Limpopo. "Ro vhigelwa tshiwo itshi ra gidimela afho he tshiwo tsha bvelela hone. Rori ri tshi swika ra wana mukegulu na ṅwana wa mutukana vho no hwalelwa vhuongeloni, ngeno vha tshumelo ya shishi vho khwaṱhisedza u ri sia ha mukalaha Vho-Frank Mkhachani Baloyi. Tshivhangi tsha mulilo uyu atshi athu u ḓivhiwa, vha khou bvela phanḓa na tsedzuluso," vha amba.
Murangaphanda wa kusi uku na mukhantselara Vho-Ngobeni vhari tshiwo itshi tsho shusha vhadzulapo. "Roṱhe ri khou lila. Vha muṱa vha ṱoḓa thikhedzo yoṱhe ine vha nga i wana kha tshifhinga itshi tshi konḓaho. Ri khou thusa nga nḓila dzine ra kona u ri vha kone u vhulunga vha muṱa wavho nga nḓila yo teaho," vha amba.
Vho-Baloyi vhari vha tama u vhulunga vhafunwa vhavho nga Mugivhela u ḓaho wa ḽa fumi rathi, fhedzi izwo zwi ḓo konadzea arali vhavha vho fhedza u ṱolwa uri vho lovha ngani.