Ṱhalutshedzo nga Khathutshelo Raliphaswa.
Vhavenda Vho Nthuseni Randima vha ḓo dzulela u elelwa sa muhulwane wa Musanda na mueletshedzi vhe vha dzulela u tsireledza vhuhone na tshirunzi tsha vhurangaphanḓa ha sialala. Vho Nthuseni vho fhira fhano Shangoni nga Mugivhela wa ḽa rathi Fulwana vhuongeloni ha Donald Fraser nga murahu ha ulwa na vhulwadze hodzhiyaho tshifhinga tshilapfu. Nga tshifhinga itsho vhovha vhe na minwaha ya 65.
Vho Nthuseni vhovha Vhavenda na mueletshedzi wa murangaphanḓa wa sialala kha muvhundu wa Khubvi, Vhamusanda Vho Thinawanga Mmbangiseni Randima.
Vha tshi ḓivhiwa khiwne nga ḽa "Makhulu", Vho Nthuseni vhovha vha tshi ḓivhelwa uvha makhanikhe wadzigoloi vhare na vhukoni vhe vhavha vha tshi kovha nḓivho yavho na vhaṅwe vhomakhanikhe uri vha kone u ṱuṱula nau alusa vhukoni havho, vhunzhi havho zwa zwino ndi vhoramabindu vho bvelelaho zwavhuḓi kha mabindu avho sa vhomakhanikhe. Vho dovha hafhu vha shela mulenzhe kha u tumbula tshigwada Khubvi tsha vhatshini vha Tshikona, vha dovha hafhu vha dzhenelela kha mishumo ya Musanda u fana na vhuṱambo ha Thevhula ya lushaka lwa Randima vhune ha itelwa u takadza vhafasi.
Vhamusanda Vho Thinawanga Mmbangiseni Randima vho khwaṱhisedza u fhira fhano shangoni ha mukomana wavho kha vha Limpopo Mirror. "Ndi Ngoho zwauri Vhavenda vho fhira fhano shangoni. Ḓuvha ḽe vha lovha ngalo, ndo vha dalela vhuongeloni he ra vha na nyambedzano ya ndeme ya nga ha vhurangaphanḓa ha sialala na miṅwe mishumo ya muṱani. Musi ndi tshi onesa vhuongeloni ro ita nau laelana zwavhuḓi, ri sa ḓivhi uri ndi maṱutshele avho. Naho vhovha vha sa khou vuwa zwavhuḓi, rovha ri na fulufhelo ḽauri vha ḓo fhola, uri vha kone u vhuya hayani ri bvele phanḓa na u khwaṱhisa vhurangaphanḓa ha sialala ha Randima kha mishumo yavho ye vha vha vha tshi ita sa muṅwe wa vhahulwane vho salaho," vha amba.
Vhamusanda Vho Randima vho amba zwauri muṱa na vhadzulapo vha Khubvi vha khou dzudzanya mbulunga yo fanelaho ya mukomana wavho. "Ro kundelwa u ṱanganedza uri Vhavenda vhashu vho fhira fhano shangoni ngauri vhovha muthu e avha a tshi funwa nga vhathu vhoṱhe muvunduni washu. Na vhana vhaṱuku vhovha vha tshi vha takalela hone vha tshiri u vha vhona vha tavha mikosi vhari "Makhulu!"," vha amba
Tshumelo dza vhukati ha vhege dzo vha hone ḓuvha ḽiṅwe na ḽiṅwe nga awara ya vhuṱanu nga madekwana Musanda wa Khubvi. Vhavenda vho vhulungwa zwavhuḓi Zwiendeulu zwa Ha Randima nga mugivhela wa ḽa fumi-raru Fulwana.