Tshiṱori nga Elmon Tshikhudo. Ṱhalutshedzo nga Khathutshelo Raliphaswa.
Nḓowetshumo ya vhutsila na vhutsila fhano Limpopo ngau angaredza yo tibiwa nga Gole ḽitswu nga lufu lwa muṅwe wa Mutambi are na vhukoni vhuhulwane ha vunḓu, Azwidohwi Tshirangwana.
Mutambi wa matambwa wa minwaha ya 53 a bva Maniini, ane a ḓivhiwa nga vhathu vhanzhi sa Dzhiawolala, o lovha nga ḽa 4 Ṱhafamuhwe nga murahu ha vhulwadze vhulapfu fhedzi vhu songo ṱalutshedzwaho. Ndi ene mutambi wa vhuvhili ane a divhea nga u bva Vhembe o lovha nga tshifhinga tshipfufhi. Lufu lwawe lu tevhela lwa Ndivhuho Munyai, lune lwa ḓivhiwa nga vhathu vhanzhi sa Mareda nahone zwenezwino sa Major 100 kha litambwa ḽa Phalaphala 'Ndi Yone Mini Yeneyi', we a lovha kha khombo ya tshiendedzi nga ṅwedzi wa Ḽara 2024.
Mushumo wa tshihumbudzo wa u hulisa Dzhiawolala wo farelwa hayani hawe ngei Maniini, nnḓa nyana ha Thohoyandou, nga Mugivhela, ḽa 8 Ṱhafamuhwe. O vhulungiwa nga Swondaha ya ḽa 9 March. Tshumelo iyi yo vha yo dzhenelwa nga vhashumisani vha bvaho kha nḓowetshumo ya zwa vhuḓimvumvusi, hu tshi katelwa Vho Isaac Mamushiana vha Vhakoma Productions, vhe vha wana Dzhiawolala nahone vha vha ṋea luvhanḓe lwa u sumbedza vhukoni havho. Vhaṅwe vhalilaho vho vha vha tshi katela vhatambi vha litambwa ḽa SABC 2 Muvhango vhane vha ḓivhea sa Vhangani, McDonald Ndou a ḓivhiwaho zwavhuḓi sa KK, khathihi na Vho Masindi na Suzan Ravuku.
Musi vha tshi amba nga mushumo wa tshihumbudzo, Mamushiana o ṱalusa munnaavhane Dzhiawolala sa tombo ḽi sa anzeli u wanala na mutambi wa matambwa ane a nga kona u shuma nga nḓila dzo fhamba-fhambanaho.
"Ro ṱangana nga 2011, nahone ndo ṱavhanya u vhona vhukoni hawe. Mathomoni, zwo vha zwi tshi vhonala zwi sa konadzei u mu posa sa muṅwe wa vhabvumbedzwa vhashu, fhedzi musi ndi tshi sendela tsini nae, o vha o ḓilugisela, nahone zwo salaho ndi ḓivhazwakale. Litambwa lawe la u thoma ho vha hu Mbambe, wo bveledzwaho nga 2011, nahone o bvela phanḓa na u tamba kha maṅwe matambwa vhanzhi vhukuma. Matambwa mivhili miswa ye a tamba khayo i kha ḓi ḓo bviswa. Nga 2011, zwileludzi zwa vhudavhidzani ha nnyi na nnyi zwovha zwi songo ḓala u fana na ṋamusi, nahone vho ri ṱuṱuwedza uri ri rengise dzi DVD dzashu rine vhane. O ita zwavhuḓi nga nḓila yo khetheaho kha ḽeneḽi sia," vha amba.
Mamushiana o engedza nga uri Dzhiawolala o vha e na vhukoni vhuhulwane nahone a nga tamba mubvumbedzwa muṅwe na muṅwe nga hu leluwaho. O ri: "Nḓowetshumo ya vhutsila ha u sika a i nga ḓo vhuya ya fana arali hu si Dzhiawolala."
Mufumakadzi wavho, Vho Annah Mulaudzi, vho talutshedza lufu lwavho sa u xelelwa huhulwane kha vha muta.
"Ro vha ri roṱhe lwa miṅwaha ya 14, nahone yashu yo vha i mutambo wo itwaho ṱaḓulu. Munna wanga o vha e muthu wa lufuno we a vha a tshi dzulela u mwemwela. Miswaswo ye a i sumbedza khagala yo vha i tshi engedzea kavhili hayani. Ro vha ri na pulane nnzhi roṱhe, nahone tshithu tshine tsha khakha vhukuma ndi tsha uri vhana vhashu vha khou kundelwa nga u ṱanganedza uri a vha tsha ḓo dovha vha mu vhona. Ri ḓo mu ṱuvha vhukuma," vha amba vha tshi lila.