Nganeavhutshilo. Ṱhalutshedzo nga: Khathutshelo Raliphaswa
Ṅwaha uno nga ṅwedzi wa Lambamai, vha gurannḓa ya Limpopo Mirror vho anḓadza tshiṱori nga ha mukegulu Vho-Avheani Munyai, vha tshi pembelela minwaha ya ḓana. Vho-Munyai vhovha vha tshi dzula Phadzima Mazhazhani, kusi kure nnḓa ha Tshitandani.Vhodorisia mudini wavho nga Lavhuraru, ḽa mbili Thangule.
Vho vhulungelwa mavhiḓani a Phadzima Dzumbathoho nga ḓuvha ḽa u pembelela vhafumakadzi ḽa lushaka, la ṱahe Thangule.
Vho-Munyai vho bebwa nga ḽa ṱhanu Lambamai nga ṅwaha wa ḓaṱahe fumbiliraru. Naho vhovha vhe mualuwa, vhovha vha tshe na nungo u swika maḓuvha avho au fhedza. Kha nyambedzano na vha nyanḓadza mafhungo ino, vhovha vha kha ḓi kona u tshimbila zwavhuḓi nga vhoṱhe, vha tshi kona na u shuma mishumo ya hayani vha sina thuso ya munwe muthu, na u kona u humbula zwe zwa itea kha maḓuvha avho a minwaha iyi ya ḓana, naho vha songo dzhena tshikolo.
Muḓuhulu wa Vho-Munyai, Vhutshilo Mavhungu, o elelwa nḓila ye makhulu awe vho vha vha tshi ṱalutshedza ngayo zwiṱori zwavho, zwihulu zwiṱori zwine zwovha zwo tea zwo ṅwalwa fhasi u itela murafho u ḓaho. "Vhovha vha tshi touvha bugu i tshimbilaho, hone na muhumbulo wavho u tshi na nungo dza u humbula zwinzhi. Ri touḓi tsola uri ngavhe ri kanḓise zwoṱhe zwe vha ri kovhela, ro balelwa nga hone u humbula uri ri ḓovha navho lwa tshifhinga tshilapfu. Ri tou livhuwa uri ro kona u sala na nḓivho na zwiṱori zwine ra ḓo fhirisela kha murafho u ḓaho," a amba.
Naho vha khou lila nga u ṱuwelwa nga makhulu, Mavhungu uri u livhuwa Mudzimu nga uvha phaṱhutshedza nga Vho-Munyai. "Vhovha vha tshi takalelwa nga vhanzhi, vhovha vhe na muya wo fholaho hone vha sa vhaisi muthu. Rovha vha mashudu uvha navho kha zwifhinga zwinzhi zwa tshipentshele. Vho fhedza yavho ndima fhano shangoni, ri fulufhela uri vho eḓela nga mulalo," a tshi vhina nga u rali.