Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Vho-Charity Mukondeleli vhane vhavha mugudisi wa mutambo wa bokiseni vho nangwa sa mugudisi wa ṅwaha nga vha World Boxing Federation (WBF) nga ḓuvha la mushumo we wa farwa nga ḽa fumbili ina Ṱhafamuhwe ṅwaha uno.
Vho-Mukondeleli vha bvaho Ha-Sinthumule vho huliswa zwi tshi tevhela u gudisa vhaswuhana kha mutambo uyu vhane vho no fhufhisa fuḽaga ya Afrika Tshipembe u mona naḽifhasi kha miṱaṱisano ine vha dzhenelela. Vho ṱuṱuwedzwa nga mugudisi makone Vho-Nick Durandt, vha thoma u gudisa mutambo uyu wa bokiseni nga ṅwaha wa gidi mbili fumi malo.
Vho-Mukondeleli vho takala vhukuma nga upfa dzina ḽavho vha tshi vhidzwa nga muphuresidennde wa WBF, Vho-Howard Goldberg, nga ḓuvha iḽo. "Ndo pfa unga ndo tou karuswa kha muḽoro. Ndi a ḓi rwa khana ngau pfufhiwa tshiphuga itshi. Ndi tama u livhuwa mutambi wa kale wa bokiseni Vho-Phillip Ndou, mugudisi Vho-Nick Durandt na mufumakadzi wanga nga thikhedzo ye vha nṋea yone. Tshifhinga tsha murahu ndi tshi vhudza Vho-Nick Durandt uri ndi ṱoḓa u fana navho nkha uvha mugudisi makone, vho mmbudza uri zwia konadzea, tshihulwane ndi uvha na mbonela phanḓa wa ṱutshela zwi sa vhuedzi. Ndi livhuwa zwihulu mufumakadzi wanga, ngauri vho dzulela u nṱuṱuwedza uri ndi bvele phanḓa nau ḓisa mveledziso kha mutambo wa mafeisi," vha amba.
Munwe wa vhatambi vha mutambo uyu, Thato Molokwana, uri Vho-Mukondeleli ndi muthu vhane vha funa u gudisa mutambo wa mafeisi, vha dovha hafhu vha ṱhogomela vhagudiswa vhavho. "Vho-Mukondeleli vha takalela vhathu nau thusa vhashai. Lufuno lwavho kha mutambo wa bokiseni lua mangadza," vhaamba.
Vha-Mukondeleli vhari vha ṱoḓa u bveledza vhatambi vha mutambo wa bokiseni. Vha dovha hafhu vha ṱuṱuwedza vhadzulapo uri vha thuse u bveledza vhatambi makone kha mitambo yo fhambanaho, u itela vhumatshelo.