Tshiṱori nga Kaizer Nengovhela. Ṱhalutshedzo nga Khathutshelo Raliphaswa.
Mugidimi wa Mbambe ndapfu ane a ḓivhea ubva Vhembe, Vho Humbulani "Rasta" Mudau vha bvaho Tshikota, vhari vho ḓiimisela u vha na gundo kha mbambe ya Comrades Marathon ya ṅwaha uno.
Vhathu vha bvaho u mona na ḽifhasi vha ḓo vha vha tshi khou ya KwaZulu-Natal nga ḽa 8 Fulwi u itela u shela mulenzhe kha ultra-marathon i ḓivheaho vhukuma ya ḽifhasi. Kha vhagidimi vha 22 000 vhane vha khou lavhelelwa u ḓi-tevhedza ngei Pietermaritzburg u itela u thoma hu ḓo vha hu si gathi u bva Vhembe. Vho Mudau, vhane vha khou ṱoḓa u vha muṅwe wavho, vho no fhedza mbambe dza nṱha dza shango dzo vhalaho, ngauralo vha a ḓivha zwine vha fanela u zwi lavhelela. Vho rekhoda tshifhinga tshawe tsha khwine kha Comrades nga 2024, musi vha tshi fhedza nga 10:09:45.
Vho vhonwa vha tshi khou ita ndowendowe ngei doroboni Louis Trichardt vhege yo fhiraho. Musi Limpopo Mirror vha tshi vha fara, vho vha vha tshi khou sedza kha tshivhumbeo tshavhuḓi nahone vho ḓilugisela zwavhuḓi nḓila ya 90 km, ine ya fhela Durban ṋaṅwaha.
"Ndo thoma u ḓilugisela mbambe mathomoni a Ṱhangule ṋaṅwaha. Ndo no ḓi ṱanganya khilomithara nnzhi u bva tshe nda thoma u lugiselela, nahone ndi pfa uri zwino ndo no ḓilugisela," vha ralo.
Vho Mudau vho engedza nga uri vho ita dzi nḓowe nḓowe nga maanḓa nahone vho vha vha tshi khou fulufhela u khwinisa tshifhinga tshavho. "Zwoṱhe zwi bva kha u ḓikumedzela na u livhisa ṱhogomelo. Ndi livhisa ṱhogomelo na u ḓiimisela, ngauri ndi gidima ndi tshi ṱoḓa u ḓitshidza, nahone nga thikhedzo ine nda i wana kha thimu yanga, ndi fulufhela uri ndi khwine."
Vho ṱanganedza na u livhuwa vhathu vhoṱhe vhe vha vha tikedza kha mushumo wavho woṱhe wa u gidima. "Vhathu vhanzhi vho nthusa nga zwa masheleni, nga vhuḓifari nahone vha nṱuṱuwedza uri ndi shume nga maanḓa. Arali zwo vha zwi songo vha itela, a thi humbuli uri ndo vha ndi tshi ḓo vha ndo swika kule nga u rali," vha ralo.
Nyeletshedzo yavho kha vhaṅwe vhagidimi vhane vha ṱoḓa u swikelela zwipikwa zwavho ndi u dzula vho livhisa ṱhogomelo na u vhea zwoṱhe zwanḓani zwa Mudzimu.