Tshiṱori nga: Entertainment. Ṱhalutshedzo: Khathutshelo Raliphaswa.
U ṱutshela nḓowetshumo ya muzika ha Vho-Joel Nnyi Thivhafuni nga ṅwaha wa gidimbili ṱahe zwo sia vhafuni vhatevheli vha muzika wa rege vho bilufhala nau ḓi vhudzisa uri naa vho fhelela ngafhi nga murahu hau andisa aḽibamu thangeli yavho ya u thoma ye ya vhidzwa 'Judge Not' – U songo haṱula. Aḽibamu thangeli iyo yovha ina nyimbo dza fumi khayo.
Uya nga vhatevheli vha muzika, aḽibamu thangeli iyo yovha i tshi swikelela kha luṱa lwa uvha aḽibamu i mvumvusaho u mona na ḽifhasi nga nḓila ye yavha i tshi vha mvumvusa ngayo nga muongo uyo wa rege. Lwa minwaha ya fumiraru yo fhiraho, vhatevheli vha Vho-Thivhafuni vhovha vha tshi ḓi vhudzisa uri Vho-Thivhafuni vho fhelela ngafhi hone ndi ngani vha sa anḓadzi muzika.
Vha nyanḓadza mafhungo ya Limpopo Mirror vho fara lwendo lwau ṱoḓisisa nga ha nzulele ya Vho-Thivhafuni, he vha swikelela kha uvha wana kha tsimu yavho ire kusini kwa Tshivhongweni, nnḓa ha Musina. Nga u nwethuwa lwa u tou ḓadza tshifhaṱuwo, Vho-Thivhafuni vho ṱalutshedza uri ndi ngani vho ṱutshela nḓowetshumo ya muzika nga tshihaḓu lwa minwaha iyi yo fhiraho.
"Aḽibamu thangeli yanga yau thoma yo touvha aḽibamu ya lushaka kha vhafuni vha muzika a rege, vhe vha ṱanziela uri na ngoho ndi yone ya khwine yo andiswaho kha lushaka. Ndo shuma aḽibamu thangeli iyi ndi na vhoramuzika vha fanaho na Kenny Murabi, Ananias Begwa, Ephraim Masindi, Derick Makhesha, Constance Kwinda, na Nkhangweleni Netshivhongwani, vhe vha thusa u bveledzisa 'Judge Not' nga nḓila i fushaho nḓevhe dza vhatevheli. Ndori u ṱutshela mushumo wanga wa vhudededzi minwaha ya fumbili-mbili yo fhiraho, nda thoma mabindu a vhulimi na vhuendi. Ndi yone nḓila ye nda ṱutshela yone muzika sa izwi ndo fanela u fhedza vhunzhi ha tshifhinga tshanga ndi khou tshimbidza mabindu zwavhuḓi," vha amba.
Vho-Thivhafuni vhari vha khou dzudzanya u anḓadza aḽibamu thangeli iyo kha zwileludz zwa thengiso ya muzika sa izwi i tshe hone nga murahu ha minwaha i fhiraho ya fumi.
Vha tshi vhudziswa a vha ḓi tsola kha u ṱutshela vhudededzi?, vhone vhari: "U thoma mushumo wa vhubulasi yovha inwe ya tsheo dza khwine dze nda dzia vhutshiloni. Zwa zwino ndi na vhashumi vha furathi malo kha mabulasi anga mavhili. U ḓi vhona ndi tshi shela mulenzhe khau thusa vhadzulapo u ḓi unḓa na u sikela vhathu mishumo zwi nṋea maanḓa. Ndi dovha hafhu ndavha na vhashumi vha fusumbe vhane vha shuma nga tshifhinga tsha u kana. Zwibveledzwa zwa mabulasi aya zwi rengiswa ngeno hayani, u mona na shango, na u mona na lifhasi."
Vhatevheli vha muzika wa rege vha ḓo takalela u ḓivha uri naho Vho-Thivhafuni vha tshi dzula vhe na mishumo yavho, vha khou lugisela u vhuyela kha nḓowetshumo ya muzika u andisa alibamu yavho ya vhuvhili.