Tshiṱori nga Thembi Siaga. Ṱhalutshedzo nga Khathutshelo Raliphaswa.
Vho Joseph Khathutshelo Nelushi (50), vhane vha bva Hamudimeli kha vhupo ha Nzhelele, vho fhedza vho kona u kuvhanganya garaṱa yavho ntswa ya vhuḓiṱalusi - vho fhedza miṅwaha i fhiraho furaru ya vhuleme vhu tshi vhangwa nga vhufhura ha vhuḓiṱalusi.
Mathomoni a miṅwaha ya 1990s, mudzulapo wa shango ḽa nnḓa o ṱangula ṱhanziela ya mabebo ya Vho Nelushi nahone a i shumisa u wana ḽiṅwalo ḽa vhuṋe nga vhufhura. Hezwi zwo vha sia vha sa koni u swikelela tshumelo dza ndeme, u fana na u vula akhaunthu ya bannga, u ita khumbelo ya nnḓu, u vusuludza ḽaisentsi yavho ya u reila kana u wana mushumo u ṱoḓaho .
Nga murahu ha u bvisela khagala nyanḓadzamafhungo na u ṱanganelana ho livhaho na Muhasho wa zwa Muno, Vho Nelushi vho wana SMS ine ya khou vha laedza uri vha ṱanganedze garaṱa yavho ntswa ya ID ya musalauno, ye vha i ita zwino.
Mathomoni a uno ṅwedzi, muhasho wa muno wo khwaṱhisedza uri ṱhoḓisiso dzawo dzo wana uri mudzulapo wa nnḓa wa Zimbabwe o ṱangula ṱhanziela ya mabebo ya Vho Nelushi nga 1994 u itela u wana ID nga vhufhura.
"Ndo takala vhukuma nga murahu ha miṅwaha yoṱhe heyi ya furaru ndi tshi khou tambula. Vhananga vho vha vha si na tshifani tshanga, fhedzi zwino ndi ḓo zwi shandukisa. Ndi khou ṱoḓa u vhuisa nnḓu yanga ya RDP ngei Musina, ye ya vha i tshi shumiswa nga fhasi ha dzina ḽanga na tshifani. Naho zwo ralo, muṅwe muthu o wana nnḓu, a tshi shumisa ID yo dovhololwaho, musi ndi tshi sala ndi si nayo," vha ralo.
Vho Nelushi vho ri vha khou ṱoḓa uri zwoṱhe zwi wane zwoṱhe nga fhasi ha vhuḓiṱalusi hawe zwi tshi vhuyelela khae. Vho ri: "Zwa zwino, ndo vula akhaunthu ntswa ngei Capitec Bank, zwithu zwe nda vha ndi sa koni u zwi ita kale."
Muambeli wa mapholisa a Vhembe Vho W/O Vuledzani Dathi vho amba uri musi mapholisa vha tshi sedza nomboro ya ID ya Vho Nelushi, vho wana i ya munna ane a pfi Khathutshelo Joseph Nelushi. O farwa, khathihi na vhaṅwe vhararu, nga ḽa 16 Lambamai 2025 ngei Musina. Milandu i tshimbilelana na u humbulelwa u vha na thundu yo tswiwaho, nga fhasi ha SAPS ya Musina ire na nomboroya 255/05/2025.
Muambeli wa huhasho wa Zwamuni Vho Thulani Mavuso vho vhudza vha Limpopo Mirror uri nomboro ya vhudele ya vhufhura yo no dzima nga dzi 24 Fulwana 2004 u thivhela u shumiswa luvhi hunwe. Vho amba uri mufhuri a nga vha o shumisa khwaṱhisedzo ya zwanḓa ya minwe.
Muhasho u bva tsheetsho wo khwaṱhisa maitele avho anga u ḓivhadza maitele a Lushaka a u Ṱalula Mafhungo a Muno na maitele o tsireledzeaho ya Vhutshilo ya u bveledza garaṱa dza ID dza vhuṱali.
"Maga aya o itelwa u lwa na u tswiwa ha vhuḓiṱalusi na mishumo ya vhufhura, u fana na ine ya tshimbidzana na zwa u fhaṱa dzinnḓu na magavhelo a matshilisano. Ho wanala uri mudzulapo wa nnḓa o ita khumbelo, a tshi shumisa ṱhanziela ya mabebo ye ya vha i si yawe, nahone a hu na mushumi we a wanala e na vhushayanungo," Vho Mavuso vho ralo.