Tshiṱori nga: Frank Mavhungu. Ṱhalutshedzo nga: Khathutshelo Raliphaswa.
Nga murahu ha minwaha ya fumbili-rathi kha uvha mulanga mitambo, Vho Joseph 'The Fire Extinguisher' Mammba vha bvaho Hamakhuvha kha vhupo ha Vhufuli vha khou notha khamushumo wavho wa ulanga mutambo ya bola ya milenzhe. Vho Mammba vho thoma uvha mulanga mitambo nga ṅwaha wa gidiḓaṱahe fuṱahe-sumbe vha tshe na minwaha ya fumbili-sumbe fhedzi. Vhari Vho Rudzani Mulaudzi na Vho Livhuwani Netshiongolwe ndi vhone vhathu vhe vha vha vha tshi vha ṱuṱuwedza kha mushumo uyu. Vhanna avho vhavhili vho no swika kha luṱa lwa vhaḓivhi kana vho makone kha buḓo iḽo ḽa uvha vhalanga mitambo.
Nga murahu ha u langa mitambo khaliga yakale ya Sibasa Football Association (ine ifhovhidzwa Thulamela Football Association zwa zwino) lwa khalaṅwaha nṋa, Vho Mammba vho ḓou aluselwa kha ḽigi ye yavha itshivhidzwa Castle ya vhupo Ha Vhembe. Vha fhedza vho aluselwa kha u langa mitambo ya ḽigi ya Vodacom ya nyaluso, ine zwa zwino ya ḓivhea sa ḽigi ya ABC Motsepe.
Sa mudededzi wa vhana ba tshikolo vhovha vha tshi ṱangana na dzi khaedu dza u langa mitambo ya vhukati ha vhege, zwe zwa vha kombetshedza uri vha humbele u tsitselwa kha ḽigi dza fhasi. Ndi he vha tsitselwa kha u langa mitambo ya ḽigi ya Safa Vhembe u vhuya u swika vha tshi notha.
Vha tshi vhudziswa uri vho no vhuya vha ṱangana na u ṱhaselwa naa nga vhatambi kana vhaṱaleli, vhari kha lwendo lwavho lwa buḓo iḽi, ahuna na ṱhaselo ye vha vhuya vha ṱangana nayo. Hone dzina ḽavho ḽa " The Fire Extinguisher" ḽo sikwa nga u vhona vhukoni havho ha u langa mitambo ya maimo u fana na mitambo ya dzi thimu dzavhupo vhuthihi na ya u alusa vhatambi na dzi thimu.
Vho Mammba ndi mugudisi wa tshikolo tsha fhasi tsha Makonde hone vha eletshedza vhalanga mitambo vhaṱuku uri vha ṱutshele kule na u dzhia masheleni a tshanḓa nguvhoni uri vha kone u vhumba maano au shandukisa mvelelo dza mitambo. Vhari vha ḓo bvela phanḓa na u bveledzisa vhalanga mitambo vhaṱuku.