Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
Vho-Joyce Makhado vha minwaha ya fusumbe-thihi u bva fhaḽa Tshivhilwi Dzhemeni nnḓa ha Ṱhohoyandou, vhovha vhe na muḽoro wa uvha na nnḓu ya vhuḓi vha tshi swika kha tshifhinga tshavho tsha u awela fhedzi muḽoro uyo wo moda vhege yo fhelaho nnḓu yavho i tshi swa ḽore-ḽore. Vho Joyce vhari vho tambula vhatshi fhaṱa nnḓu iyo, he vha thoma ngau fhaṱa Phera nthihi vha engedza nga Phera ṱhanu nga murahu ha tshifhinga. Vho-Joyce vho sumbedza u vhaisala vhukuma nga tshiwo itsho tsho vha bvelelaho.
Tshiwo itsho tsho bvelela nga Lavhuvhili ḽa rathi Fulwi, nga matsheloni. Sa izwi hovha husina muthu hayani nga itsho tshifhinga, thundu dzavho dzoṱhe dzo swalore kha mulilo uyo. Zwa zwino vha muṱa vho sala vha sina zwiḽiwa, zwiambaro kana hone vhudzulo.
Vha muṱa vha khou humbula uri tshivhangi tsha mulilo uyu hu ngavha hu thaidzo ya muḓagasi sa izwi tshivhangi tshi sa ḓivhei. Vho-Prince Nemasetoni, murwa wa Vho-Makhado, vhari vho ṱanganedza ṱhingo vha tshi khou shuma kusini ukwo, vha tshi vhudziwa nga ha mulilo une wa khou duga. Vhari vho gidimela hayani, he vha wana vhadzulatsini vha khou ṱalela nnḓu i tshi khou duga mulilo sa zwi hovha hu sina maḓi au shela u dzima mulilo uyo.
Vho-Nemasetoni vho sumbedzisa u vhaisala ha mme avho nga tshiwo itshi. Tshiwo tsho itea vhoya u ṱola mashaka avho ngei Modimolle. "Vha khou balelwa u ṱanganedza uri maanḓa avho a minwaha minzhi o fhelela mavuni sa izwi vho fhedza minwaha ya fumi ṱhanu vha khou fhaṱa nnḓu iyo. Na nne ndo xelelwa nga thundu dzanga u fana na mushumo wanga we ndau ita ndi gudedzini. Ro vhaisala sa muṱa hone ri khou humbela thuso kha vhane vha nga kona u ri thusa hune vha nga kona. Zwa zwino ro ḓi tika nga mukhantselara, vhe vha dzhia zwidodombedzwa zwashu vhari vha ḓo salamurahu fhungo iḽi," vha amba.
Vho-Nemasetoni vhari mapholisa vhovha kaidza uri vha songo vula mulandu sa izwi sa muṱa vha sa humbuleli uri hu ngavha huna muthu o shelaho tshanḓa kha tshiwo itshi. Muambeli mufareli vho sedzheni Vho-Vuledzani Dathi, vhari vho mangadzwa ngauri ahuna mulandu wo vulwaho.