Tshiṱori nga Victor Mukwevho. Ṱhalutshedzo nga Khathutshelo Raliphaswa.
Kha dzulo ḽi songo ḓoweleaho nga masiari, vho maine vhavhili vho ḓivhonadza khothe khulwane ya Thohoyandou nga 17:45 nga Musumbuluwo, vho sedzana na milandu mihulwane, hu tshi katelwa na u vhulaha.
Humbulani Munzhelele (55) na Mpho Nefale (38) vha khou hweswa milandu mivhili ya u vhulaha, milandu mivhili ya u dzhia muthu nga khani, mulandu muthihi wau luka maano au vhulaha, na mulandu muthihi wa u vha na miraḓo ya muthu nga murahu ha musi hu tshi pfi vho wanala vhe na madethele mavhili vhathu.
Mafhungo a khothe o lenga nga murahu ha musi muṅwe wa vhahumbulelwa, Mpho Given Nefale, o ita u ḓibula he ha thoma nga 14:00 u swika nga 17:30.
Vhahumbulelwa avha vhavhili vho ṱanganela na vhahumbulelwa vhanwe vhavhili vhofarwa uthoma, Tshilidzi Phalandwa (43) na Balangani Sedzani Tshivhonani (32), vhe vha vha vho ḓivhonadza khothe ya madzhisitarata ya Thohoyandou nga Ḽavhuṱanu ḽo fhiraho (1 Ṱhangule)
Mulandu u tshimbilelana na u ngalangala ha vhathu vhavhili vha bvaho Malavuwe Village – Vho Rendani Tshigwili na ṅwana wavho wa miṅwaha mivhili - vhe vha fhedzisela u vhonwa nga ṅwedzi wa Shundunthule ṋaṅwaha musi vha nḓilani ya u ya mavhengeleni ngei Thohoyandou. U ngalangala havho ho vhigwa kha Tshiṱitshi tsha Mapholisa tsha Thohoyandou, zwa ita uri hu vhe na ṱhoḓisiso nga u ṱavhanya.
Nga Ḽavhuraru, ḽa 30 Fulwana, vhaṱoḓisisi vhe vha shuma nga nḓila i fulufhedzeaho vho wana zwitumbu zwa mme na ṅwananyana. Vhahumbulelwa vhavhili vho farwa nga murahunyana ha musi vha tshi ṱangana na vhutshinyi vhu ofhisaho.
Mushumo wo ṱanganelaho nga tshigwada tsha vhaṱoḓisisi vha Tshiṱiriki tsha Vhembe na tshigwada tsha mushumo wa vunḓu kha vhathu vho xelaho nga murahu vho ranga phanḓa vhaofisiri vha Hlabeni Block F, fhasi ha vhupholisa ha tshiṱitshi tsha Saselamani, he muhumbulelwa wa miṅwaha ya 55 a farwa hone.
Tsedzuluso yo engedzeaho yo isa mapholisa hayani ha muṅwe muhumbulelwa wa miṅwaha ya 38 ngei Hamuraga, kha vhupo ha vhupholisa ha Ṱhohoyanḓou, hune ha pfi ho wanala muhumbulelwa e na madethele o bviswaho kha vhapondwa vhavhili.
Vho Mbulungeni Muronga (32), munna wa mufu Rendani Tshigwili na khotsi a vhana vhavho vhararu, vho talutshedza u vhaisala havho musi vha tshi pfa nga ha mabulayo. O amba uri o vha o tshuwa nahone a tshi khou ḓaḓa nga vhuṱungu. "Ndi pfa u nga ndi muthu o lovhaho a khaḓi tshila . Ndi kha ḓi vha kha vhuṱungu vhuhulwane vhukuma nahone a thi ḓivhi uri ndi ḓo kona hani u sedza masalela a muṱa wanga musi ndi tshi khou lugisela mbulungo. Fulufhelo ḽanga zwino ndi ḽa uri sisiṱeme ya vhulamukanyi i ite mushumo wayo," o ralo.
O khwaṱhisedza uri muṅwe wa vhahumbulelwa ndi muhura wawe nahone o sumbedza u sa tenda na u vhaisala huhulwane uri muthu ane a dzula tsini nga u rali a nga ita vhutshinyi ha tshiṱuhu nga u rali.
Muronga o amba uri u na vhana vhararu - vhananyana vhavhili na mutukana - hu tshi katelwa na ṅwana wa miṅwaha mivhili we a vhulahwa. Malugana na vhaṅwe vhana vhavhili, o ṱalutshedza uri muṱa wo dzumba mafhungo a ṱungufhadzaho mathomoni, fhedzi nga murahu wo ḓisa vhashumi vha zwa matshilisano vha bvaho kha Kiḽiniki ya Malavuwe u itela u thusa u langa vhuimo.
"Zwithu zwi a konḓa vhukuma kha sia ḽanga. Vhashumi vha zwa matshilisano ndi vhone vhathu fhedzi vhane vha khou ita uri ndi dzule ndi tshi khou tshimbila," o engedza nga fhasi.
Musi a tshi vhudziswa nga ha mavharivhari a uri muhumbulelwa muhulwane o vha e na vhushaka ha vhafunani na Rendani, Muronga o ri: "Ndi zwine vhathu vha khou amba, fhedzi a thi tendi kha u pfa. A thi na vhuṱanzi ha mafhungo o raloho, nahone ndi a zwi sia henefho - sa mavharivhari."
Vho Mbulaheni Neluvhola, muphuresidennde wa Dzangano ḽa Vhalafhi vha Mvelele ya Vhembe, vho ya kha maitele a khothe vha tshi khou tikedza miṱa ya vhapondwa. O sasaladza u shumiswa ha zwipiḓa zwa muvhili wa muthu kha maitele a sialala.
"Makhulukuku washu vha ri sumbedza zwimela na u ri livhisa khavho kha miloro yashu u itela u fhodza vhathu. Ndi ngano ya uri dzithishu dza vhathu dzi shumiswa kha u fhodza. Ri khou ita khuwelelo kha vho maine vhoṱhe vha mvelele uri vha litshe u vhulaha vhathu u itela ndivho dza maitele. Miraḓo ya mivhili ya vhathu a dzi fhodzi vhathu," vho ralo. "Sa vhurangaphanḓa ha vhaalafhi vha mvelele kha Tshiṱiriki tsha Vhembe, ri khou ita khuwelelo kha vhalanguli vha mulayo uri vha si sie tombo nṱha ha ḽiṅwe kha u lwa na khakhathi dzo thewaho kha mbeu na u vhulahwa ha vhathu hu tshi itelwa miṱuvha kana mishonga.