Tshiṱori nga: Victor Mukwevho. Ṱhalutshedzo nga: Khathutshelo Raliphaswa.
Munwe wa vhalanguli vha bola ya milenzhe vhadivheaho, Vho Ronald 'Bizza' Makhadi, vha khou ya u awela kha nḓowetshumo ya zwamitambo na mushumoni mafheloni a ṅwedzi wa Khubvumedzi ṅwaha-uno, izwi ndi nga murahu ha minwaha ya fuṱhanu vhe kha nḓowetshumo iyo.
Vho Makhadi vho thoma buḓo ḽavho ḽa bola vha tshe tshikoloni tsha nṱha tsha Fhatuwani. Vhori vhe kha ṅwaha wavho wa u thoma tshikoloni tsha nṱha, vha nangwa sa mukaputeni na mugudisi wa thimu ya vhahulwane, u nangwa havho zwa sia vhaḓivhi vha bola vho akhamala sa izwi vhovha vhe muṱuku.
Nga ṅwaha wa 1981, vho ḓou nangiwa sa muṅwaleli muthusi wa dzangano ḽa Sibasa Football, he vha vha vha tshi tshimbila u bva Malavuwe vha swika Sibasa nga milenzhe u dzhenelela miṱangano.
Nga ṅwaha wa 1982, vha tshe mugudisi tshikoloni tshavho tsha nṱha tsha kale, thimu yavho yo swikelela khamakhula tshele a lusaka a tshiphuga tsha Coca-Cola fhedzi vha kundwa nga vha gudedzi ḽa Tivumbeni. Vhukati ha ṅwaha wa 1983 na 1988, vhovha mugudisi wa thimu ya Venda Homeland. Vhari zwe zwa vha nyamisa ndi u kundelwa u pfufhiwa zwiphuga lwa khalaṅwaha mbili dzi tshi tevhekana, masiandaitwa a izwi havha u litsha havho uvha mugudisi wa thimu. Nga ṅwaha wa 1984, vho farana zwanḓa na Vho Evans Munyai na Vho Terrence Muronga,vhumba dzangano ḽa North Eastern Sibasa Football (NESISA).
Nga nwaha wa 1987, vha awela kha mushumo wavho kha muhasho wa vhuno he vha vha vha khou shuma sa mabalane mufareli muhulwane, havha vhone muthu wa u thoma kha Northern Transvaal (sa zwe yavha i tshi divhiwa kale), u shuma kha dzangano ḽa bola. "Ndo shuma maimo a u fhambana ndi nḓoṱhe kha VENSA ye ya mbo vhidzwa VEFA, lwa minwedzi ya rathi," vha amba. Vho Makhadi vhovha vhone vhe vha ṱuṱuwedza u vhumbiwa ha SAFA-GNEP.
Nga ṅwaha wa 1997, vho ḓou thoma u shuma ha masipala wa Thulamela. Vho vha vha tshi tenda zwauri ndayotewa ntswa yovha yo hwesa mimasipala vhuḓifhinduleli ha u ṋea vhathu tshumelo ya vhupo ha zwa mitambo. Vhovha vhe na muhumbulo wa uri hu fhaṱwe dzi ḽaiburari, ha u gudela mavili, na midavhi mihulwane. "Ho kona u swikelelwa vhunzhi ha zwe vhavha vha tshi ṱoḓa uri zwi bveledzwa. Ahuna masipala we wa vhuya wa swikelela zwe rine ra kona u swikelela kha shango ḽashu," vha amba.
Vho Makhadi vhovha na mashudu a u kona u dalela mashango a fanaho na Beljium, Ireland, na Fura, he vha guda zwinzhi nga ha vhutsila, dzi ḽaiburari na vhupo ha zwamitambo. Vhari zwine vha ḓi tsola zwihulu nga hazwo ndi u kundelwa u wana ndambedzo dza u khwinifhadza luvhanḓe lwa Ṱhohoyandou.
Vhari vha tshi bva kha nḓowetshumo ya bola, vha ḓoya u rera kerekeni lwa tshifhinga tshothe sa zwe vha humbelwa nga vha tshivhidzo tshavho.
Mutambi wa kale wa bola vhane vha vha mudzulatshidulo wa Sterkstroom Real Chiefs, Vho Joe Nevhukalanga, vhari u tshi amba nga ha bola ya Vhembe, dzina ḽa Vho Makhadi ndi ḽine ḽa ambeswa. "Vhukoni havho ha ndaulo ndi vhune avhu vhambedzwi na ha muthu kha tshiṱiriki. Na ṋamusi, vha khaḓi thusa dzi thimu dzine dza kundelwa kha vhupo hashu uri vhavhe na nḓivho ya bola, hunwe vha shumisa masheleni avho uri hu tambiwe bola vha vhuponi uvhu. Ro dzudzanya muṱaṱisano wa ṅwaha wa bola une wa ḓovha wa u vha hulisa, une ra kholwa uri hu ḓovha wone muṱaṱisano muhulu vhuponi ha Vhembe," vha amba.