Tshiṱori nga: Silas Nduvheni. Ṱhalutshedzo nga: Khathutshelo Raliphaswa.
Vho-Thanyani Joseph Radali, vhane vhanzhi vha vha ḓivha nga ḽa Vho-Radali, ndi rabulasi vhane vha dzula kusini kwa Maraxwe-Mbahela vhuponi ha Vhembe. Vho-Radali vho pembela minwaha yavho ya ḓana na fumi nga ḽa fumbiliiṋa Fulwi ṅwaha-uno. Duvha iḽi ḽo ḓisa bembela ḽihulu kha vhadzulapo vha kusi uku vha tshi ṱangana vha pembela navho.
Vho-Radali vha vhonwa sa khotsi kha vhadzulapo vha Maraxwe-Mbahela, hone nga ḓuvha ḽavho ho pembelwa nga dzi khuwa, u imba nga dakalo, mifhululu na u vha tamelwa mashudu na minwaha minzhi.
Vha saathu u dzula tshoṱhe Maraxwe-Mbahela nga ṅwaha wa ḓaṱahe fuina, Vho-Radali vho bebwa Ha-Ratombo, tsini na Levubu nga ṅwaha wa ḓaṱahe fumiraru he vha dzula lwa minwaha minzhi. Lwa minwaha, vho vhonwa sa rabulasi a ṱhonifheaho kha kusi kwavho. Vho-Radali ndi mubebi wa vhana vha malo na mufumakadzi muthihi. Vha tenda nau eletshedza vhanwe uri uvha na mufunwa muthihi zwia engedza maḓuvha a vhutshilo sa izwi vha tshi ḓovha vha si khomboni yau kavhiwa nga malwadze a fanaho na HIV/AIDS na manwe manzhi.
Vho-Radali vho fhedza minwaha minzhi vha tshi khou shuma ḓoroboni ya Dzhohanisibege, he vha vhuya vha ḓa u shuma sa rabulasi lwa tshoṱhe. Vha lima zwibveledzwa zwi fanaho na miroho, dzi raisi na mafola. Vha elelwa musi we vha renga zwishumiswa zwavho zwau thoma, vhari na namusi vhaḓuhulu vhavho vha khaḓi zwi shumisa.
Naho Vho-Radali vha na thaidzo ya upfa vhathu na zwithu, vha kona u vhona nau ḓivha vhathu. Vha tenda uri u lalama havho ndi ngauri vho ṱutshela kule na halwa na hone vha ṱhogomela muvhili wavho nga dzi nḓowe-nḓowe dzine vha ita tsimuni yavho.
Vhamusanda Vho-Nkhodeni Mmbi, vhe vha ṱangana na Vho-Radali vha khou ita tsedzuluso dzavho dza vhurangaphanḓa ha sialala, vho livhuwa Vho-Radali kha nḓivho yavho ya luambo lwa Tshivenda, hu tshi katelwa na mirero ya Tshivenda. Izwi zwi dovha hafhu zwa sumbedza uri vha na vhuṱali na vhutumanyi na sialala ya tshivenda.