Ṱhalutshedzo nga Khathutshelo Raliphaswa.
Miṅwahani ya 15 yo fhiraho, Vho Thinandavha Goodman Ravhutsi (41) vho ḓikumedzela kha u vhulunga miri na mitshelo i sa anzeli u wanala ya mvelele kha mirafho i ḓaho.
Vho Ravhutsi, vhane vha bva kha muvhundu wa Makonde Siawoadza, vho bveledza u dzhiela nṱha vhukuma zwimela zwa vhadzulapo vhapo musi vha tshi pfulutshela vhuponi ha henefho nga 2009. Nga tshenetsho tshifhinga, Siawoadza ho vha hu fhethu huswa ho no thomiwaho, ho fukedzwaho nga ḓaka ḽo ḓalaho na u pfuma nga zwimela zwa vhadzulapo vhapo. Naho zwo ralo, vhunzhi ha vhadzulatsini vhavho vho bvisa ḽeneḽo shango uri vha kone u ita nḓila ya mahaya avho, vha fhelisa zwenezwi zwimela zwa ndeme musi vha tshi khou ita zwenezwo.
Nṱhani ha u zwi fhungudza, Vho Ravhutsi vho nanga u vhulunga zwimela dzharaṱani yavho, zwa ita uri zwi kone u tshila lwa mirafho i ḓaho. Ṋamusi, haya havho ho no vha fhethu hune ha kunga vhaendelamashango zwiṱuku, zwine zwa ita uri vhaeni vha fhise u vhona zwimela izwi zwi sa anzeli u wanala na zwine zwa khou ṱahela. Kha miri ya vhapo ye vha i vhulunga ndi Muramba, Mukolokote, Mutondowa, Muvhula, Musese, Muhatu, Musalamarubini, na Mututulwa. Vhunzhi ha miri iyi i aṋwa mitshelo ya ḓaka ine ya funeswa nga vhathu vha henefho.
"Musi ri tshi khou aluwa, miri iyi ya mvelele yo vha yo ḓala, nahone zwi a nṱungufhadza u vhona i tshi khou fheliswa. Arali wa tshimbila u mona na muvhundu hoyu ṋamusi, zwi ḓo konḓa vhukuma u wana muṅwe wa miri iyi mikhethwa. Vhathu vho vha fhungudza nga nḓila i si na vhuṱali, naho zwo ralo zwino vha ḓa hayani hanga u itela u vhona kana u sumbedza vhana vhavho tshipiḓa itshi tsha ndeme tsha ḓivhazwakale yashu," vha ralo.
Vho Ravhutsi vha a ḓihudza nga u vhona vhathu vha henefho vha tshi dalela dzharaṱa yavho u kuvhanganya mitshelo ya ḓaka ine vha si tsha kona u i wana huṅwe fhethu. Vho ṱalutshedza vha ri: "Ndo vha litsha vha tshi nanga mitshelo ya mahala ngauri tshipikwa tshanga a si tsha u ita tshelede, fhedzi ndi u vhulunga miri iyi na mitshelo yazwo uri muṅwe na muṅwe a zwi dzhiele nṱha."
Vho ṱuṱuwedza vhane vha kha ḓi vha na miri ya mvelele kha thundu dzavho u itela u i tsireledza nṱhani ha u i fhelisa. "Arali ri sa vhulunge miri iyi, ndi nnyi ane a ḓo i vhulunga? Arali ra kundelwa u ita nga u ralo, mirafho miswa vha ḓo sola kha riṋe nga u sa tsireledza vhufa havho. Miri iyi yo khetheaho i khou fhela sa vhutsi muyani," vha engedza.