Tshiṱori nga: Kaizer Nengovhela. Ṱhalutshedzo nga: Khathutshelo Raliphaswa.
Vhafuni na vhaṱaleli vha mitambo ya mavili vha khou rambiwa uvha hone kha mitambo ya vhoramavili vha vhafumakadzi vhane vha ḓo imedzana ngei Meropa Casino nga Ḽavhuṱanu ḽino ḽa fumbili-na-ṱahe Khubvumedzi. Muṱaṱisano uyu ndi tshipiḓa tsha mbekanyamushumo ya u alusa vhoramavili vha vhafumakadzi vha Africa Tshipembe, ine ya vha na ndivho ya u tumbula vhukoni vhuswa, u sumbedzisa vhoramavili vha vhafumakadzi, na u alusa na u maanḓafhadza vhoramavili vha mutambo uyu. Mitambo i ḓo thoma nga hafu u bva kha awara ya vhusumbe.
Nndwa ine vhathu vha ḓo i lavhelesa nga vhusedzi ndi ya vhukati ha ramavili wapo Lufuno Mutshayi a bvaho Tshisele, vhuponi ha Ṱhohoyandou, na Adidya Mimu a bvaho Malawi. Vha ḓo imedzana kha tshiteṅwa tsha vhuleme ha Junior Featherwieght. Mutshayi uri o ḓi lugisela mathomoni a vhege iyi, hone u fulufhedzisa vhatevheli vhawe uri u ḓo fhenya kha muṱaṱisano uyu. Uri Mimu u ḓo ṱangana na zwine ha athu u zwi vhona arali a mu nyadza. "Ahuna zwine zwa ḓo nthivhela kha u fhenya Mimu," a amba.
Gudani Mudau, ramavili wapo, ane nae a bva vhuponi ha Ṱhohoyandou, u ḓo imedzana na Phamela Matunga wa ḽa Zimbabwe kha mukovho wa vhuleme ha Featherweight. Mudau uri o ḓi lugisela, hone ha tsha kona u lindela u wana gundo kha muṱaṱisano uyu.
Minwe ya miṱaṱisano ndi ine ya ḓo tambiwa vhukati ha Bernice Ferreira na Aratwa Kesemang a bvaho Botswana, havha muṱaṱisano wa vhukati ha Sharadine Fortein u ḓo imedzana na Patience Mastara a bvaho Zimbabwe. Ngeno Ngarothe Mugeri na Lillian Molala vha tshi ḓo pfana maanḓa kha wavho mutambo. Kha nndwa yavho ya nndwa dza rathi ndi Asanda Semelane na Noluthando Ncube. Hone Asipho Nhluzana na Nomfundo Desree Xaba vha tshi ḓo imedzana kha miṱaṱisano iyi.
Mualusi wa mavili na mune wa Mama Rocks, Vho Modipadi Kgasago, vhari nndwa idzi dzi ḓo mvumvusa vhaṱaleli nga nḓila yavhuḓi. "Vunḓu ḽa Limpopo ho ḓala vhukoni zwi tshi ḓa kha mitambo ya mavili. Ri fanela u alusa vhoramavili vhapo uri vha kone u swikelela kha maimo a nṱha, uri hu kone na u aluwa mutambo ya mavili wa mirafho i ḓaho," vha amba.