Tshiṱori nga Ngerezah Netshifhefhe. Ṱhalutshedzo nga Khathutshelo Raliphaswa.
Muimbi-muṅwali wa nyimbo wa Afrika Tshipembe Vhudie, we a vuwa a vha na bvumo kha Idols SA, o vhuya na single ntswa, Lesedi. U fhambana na Yoki Yoki ya u ṱuṱuwedza, u bviswa uhu hu ṱoḓisisa nga vhuronwane fhethu ho dzikaho ha maḓipfele - u hulisa lufuno lwo xelaho na tshiga tsha mvelaphanḓa ya muthu nga eṱhe na ya u sika ya mutsila.
Musi a tshi khou amba kha nyambedzano ya zwenezwino, Vhudie o ri Lesedi yo hevhedzwa nga tshenzhemo ya vhukuma ye ya sia mvelelo dzi sa fheli. O lu ṱalusa sa: "luimbo lu ṱungufhadzaho, lwo nakaho na u sika", lwo dzhiiwaho fhethu hune ha vha na u fulufhedzea ha maḓipfele. U humbula nga ha zwifhinga zwi re na mufunwa wa tshikolo tsha nṱha ane a pfi Lesedi. Zwe zwa thoma sa u takalela ho dzikaho zwo mbo ḓi vha lufuno, fhedzi zwiimo zwo vha zwi tshi vha fhandekanya.
"Ndo vha ndi tshi funa na u funa hoyu mufumakadzi ane a pfi Lesedi nga mbilu yanga yoṱhe," o ralo. "Nga tshenetsho tshifhinga, ndo vha ndi tshikoloni tsha murole wa nṱha, ndi tshi khou dzula miṅwaha yanga yoṱhe henefho ndi tshi khou sedza muthu muthihi we nda fheleledza ndo sendela tsini na u amba nae."
Musi Lesedi a tshi khou ya Yunivesithi, Vhudie o sedzana na zwithu zwa muthu nga eṱhe zwine zwa nga ita uri muthu a si tsha vha na tshika nahone a dovholola Gireidi ya 11. O fheleledza o shandula nomboro nahone a vha a sa swikelelei. O humbula a ri: "Zwo nṱungufhadza vhukuma uri ndo vha ndi murahu nahone tshikolo tsho vha tshi tshi khou nnyimisa uri ndi si mu ṱoḓe."
Ndimana ya u thoma ya luimbo i amba nga ha u lingedza u mu swikelela nga kha khonani. Ya vhuvhili i a fhungudzea, ya khoḓa lunako lwawe nga fulufhelo ḽa uri na u mwemwela zwi nga mu vhuisa murahu. "Nga iṅwe nḓila, luimbo lwo vha lu tshi ḓo kwama nahone lwa mu vhuisa," o ralo.
Nga muzika na maḓipfele, Lesedi lwo sumbedza ndima ntswa. "U bviswa uhu ho fhambana ngauri ndo aluwa nahone ndo guda zwinzhi nga ha nṋe muṋe," o ralo. Naho a tshi tenda nga ho dzikaho, u tenda uri luimbo lu ḓo pfala nga vhunzhi. "Ndi ṱoḓa vhathu vha tshi pfa u nga vha tshipiḓa tsha luimbo ulu."
Luṱingo lwo bveledzwa nga u shumisana na mutsila wa Afrika Tshipembe TSHIA na mubveledzi wa Dutch Osini. Vhudie o ṱalusa maitele a u rekhoda sa a mafulufulu na a songo pulaniwaho, a tshi khwaṱhisa lutendo lwawe kha maanḓa a u shumisana.
Musi a tshi humbula nga ha lwendo lwawe lwa kha Idols SA, o amba uri zwo vhumba u pfesesa hawe ha nḓowetshumo nahone zwo mu thusa u fhaṱa vhatikedzi vha fulufhedzeaho. "Vhafuni vho vha vha tshi ntikedza tshifhinga tshoṱhe u bva mathomoni, ngauralo musi ndi tshi ita muzika, ndi ita vhungoho ha uri u a pfala khavho nahone ndi vha isa kha lwendo lwa muzika."
Musi a tshi sedza phanḓa, u khou pulana u aluwa nga ngomu ha muzika une wa khou shanduka wa Afrika Tshipembe ngeno vha tshi khou ṱanḓavhudza kha dzitshaka dzau fhambana dza muzika. O sedza kha u shumisana na vhaimbi vha bvaho Holland na UK.
Naho o vha a tshi khou bvelela, u khoḓa muṱa wawe na vhalanguli vhawe nga u mu ita uri a dzule o khwaṱha. "Vha dzulela u nkhumbudza zwine nda vha zwone na vhathu vhane vha ntikedza." Mvelele yawe na yone i kha ḓi vha ya ndeme kha vhuṋe hawe. "Ndi a ḓihudza ngazwo. Ndi ṱoḓa u zwi kovhela vhathu nga muzika wanga."
U bva kha tshikhala tsha u ita Lesedi huṅwe na huṅwe shangoni, Vhudie u na muloro wa zwiṱepisi zwivhili: Vhuṱambo ha Vhutsila ha Lushaka na ṱano ḽa Hootenanny.
Zwa zwino u khou shuma kha aḽibamu(thandela), ine ya khou tea u bviswa phanḓa ha musi ṅwaha u tshi fhela, ine ya vha na tshumisano u bva Afrika Tshipembe, Holland na UK. Musi a tshi khou ḓilugisela zwifanyiso na u tamba zwi tshi khou bvelela, u na mulaedza wa vhafuni vhawe: "Dzulani ni tshi tshimbila lwendo ulwu na nṋe. Lufuno lwaṋu lu bvela phanḓa lu tshi ṱuṱuwedza zwoṱhe zwine nda zwi ita."