Tshiṱori nga: Elmon Tshikhudo. Ṱhalutshedzo nga: Khathutshelo Raliphaswa.
U bva ṅwaha wa 1983, mualuwa Vho Tshililo Germinah Tshivhase vhovha vhe mushumi wa biko vhuongeloni ha Donald Fraser, he vha shuma vhe muthusi kha u kuvha zwishumiswa hanefho. Vhori vha tshi awela nga ṅwaha wa gidimbili-sumbe, nga murahu ha minwaha ya furaru-na-sumbe ya u shuma kha muhasho wa mutakalo wa Limpopo, vha sala vha sina zwine vha nga ita. Nga hone u ṱwa vho dzula hayani ḓuvha loṱhe, vha ḓelwa nga vhuludu, vha thoma u ṱoḓa nḓila dza uvha na zwine vha ita, ndi he vha vhona vhulimi hu hone ha khwine. Zwa zwino vha na mavu a linganaho mithara dza 25 x 20 hune vha ṱavha miroho ya u fhambana, hu tshi katelwa delele, phiri-phiri na dzi gaḽiki.
"Ndo fhedza ṅwaha wa gidimbili fumbili-thihi hu sina zwine nda ita, ndi tshi khou lingedza u wana zwine nda ḓo ita sa izwi ndo awela mushumo. Ndovha ndi tshi ṱwa ndo sokou dzula. Zwinwe zwifhinga ndi tshi ḓi vuwa nda ya u mona-mona mavhengeleni a Ṱhohoyandou, hu sina zwine nda renga. Nga murahu ha u humbula ndi tshi dovha, nda humbula uri ndovha ndi tshi takalela u ya masimuni. Ndi he nda fhedza nga u humbula u humela kha zwa vhulimi."
Vho Tshivhase vhari uvha mulimi khavho zwovha tshimangadzo tshavhuḓi. "Ndo thoma nga u ṱavha dzi phiri-phiri, dze nda kana zwihulu, fhedzi ndavha ndi sina ha u rengisela. Nga ṅwaha wa 2022, ndo thoma u ṱavha dzi galiki, fhedzi sa izwi hovha hu u thoma, ndo balelwa u kana nga nnzhi. Nda ya u ṱoḓa ngeletshedzo kha vhare na nḓivho nga ha u ṱavha dzi gaḽiki, nda lingedza hafhu, khano ya hone ya vha nnzhi. Ndi rengisa zwibveledzwa zwanga kha mimakete ya Gauteng na hanefha hayani, nda dovha hafhu nda salelwa na zwine ra kona u zwi shumisa hayani"
Ngeletshedzo yavho kha vhathu iri: "Muthu munwe na munwe u a kona u bveledza zwinwe na zwinwe naho mavu avho e maṱuku. Ari takutshedze roṱhe ri ṱavhe miḓini yashu sa izwi zwi tshi ḓo ri thusa u lwa na vhushai ha u ṱahelelwa nga zwiliwa, hone zwi dovha hafhu zwavha na mutakalo," vha amba.