Tshiṱori nga: Maanda Bele. Ṱhalutshedzo nga: Khathutshelo Raliphaswa.
Lwa minwaha minzhi vhadzulapo vha mivhundu ya mimasipala ya Makhado na Thulamela vhovha vho no laṱela thaula kha u isa mbilaelo dzavho kha vhuongelo ha Siloam nga ha tshumelo dza shishi sa izwi vhuongelo uho hovha hu na zwiendedzi zwa vhalwadze zwiṋa fhedzi zwine zwa shumela zwisi zwa u fhira ḓana. Vhadzulapo avha vho pfa vho rulea dzi mbilu musi MEC wa mutakalo Limpopo Vho Dokotela Phophi Ramathuba vha tshi netshedza zwiendedzi zwa tshumelo ya shishi zwa furaru-ṱhanu nga ḽa fumi-thihi Khubvumedzi ngei vhuongeloni ha Siloam.
Kha tshipitshi tsha mugwagwama gwama tsha 2023/24 Vho Ramathuba vho ṱahisa uri hu ḓovha na zwiendedzi zwa vhalwadze zwi swikaho maḓana maṱanu zwiswa, hone idzi dzi wela kha mbalo iyo. Vhege yo fhelaho, Vho Ramathuba vho netshedza zwiendedzi zwa tshumelo ya shishi zwiswa zwa furaru-na-ṱhanu vhuongeloni ha Nkhensani ngei Giyani.
Vho Ramathuba vhari na zwinwe zwiṱiriki zwa Limpopo vha tshe kha mutevhe wa u ṱanganedza zwiendedzi zwa vhalwadze zwiswa. "Tshumelo ya zwiendedzi izwi ndi ya ndeme kha vhalwadze sa izwi vha tshi ḓo wana tshumelo nga u ṱavhanya zwa thusa uri vhulwadze vhusi nane. Ri ḓo bvela phanḓa na u ḓisa zwiendedzi izwi kha vha tshumelo ya shishi u khwinifhadza nḓila dzavho dza u ḓisela vhathu tshumelo dza shishi."
Vho Ramathuba vhari zwiendedzi izwi asi zwo ḓoweleaho. "Zwiendedzi izwi zwi tou fana na vhuongelo hone hune. A zwi ngo fhambana na yunithi ine mulwadze avha e na vhaṱhogomeli tsini hawe. Ndi ṱoḓa uri vhashumi vhoṱhe vhavhe na tshiendedzi tshavho vhe vhavhili khatsho," vha amba.
Vho MEC vha khou huwelela vhadzulapo uri vha ṱhogomele na u ṱhonifha zwiendedzi izwi.
Mulangi wa tshumelo dza shishi dza mutakalo kha tshiṱiriki tsha Vhembe, Vho Solomon Mohale, vho ṱahisa nḓila ye vha takala ngayo nga u wana zwiendedzi izwi. "Rovha ri tshi shumisa zwiendedzi zwiṋa u shumela zwisi zwa ḓanalithihi furaru-rathi lune zwovha zwi tshi konḓa uri ri vha swikelele vhoṱhe. Rovha ri tshi ṱangana na khaedu kha u swika zwisini izwi nga hone uvha na magondo asa tshimbilei zwavhuḓi," vha amba.