Tshiṱori nga Thembi Siaga. Ṱhalutshedzo nga Khathutshelo Raliphaswa.
Murendi wapo Sheila "Musadzi wa Vhurendi" Mathebula u bvaho Bungeni u khou shandukisa u kwashea mbilu uri a fhole nga bugu yawe ya zwenezwino, The Power of a Wounded Woman. Zwa zwino, bugu yo vha yo hevhedzwa nga tshenzhelo yawe ya u lila u xelelwa nga murwa wawe, Pfano.
Nga u ṅwala hawe, Sheila u ṋea ipfi kha vhafumakadzi vhe vha tambula vho fhumula, vha tshi sumbedza uri mbonzhe dzi nga vha zwisima zwa maanḓa. O ṱalutshedza uri nga tshifhinga tshawe tshi konḓaho vhukuma, o wana uri vhuṱungu hawe vhu nga vha tshiṱuṱuwedzi tsha u aluwa na u konḓelela.
"Ndi khumbudzo ine ya kovhelana lwendo lwanga lwa muthu nga eṱhe lwa u fhodza na u shandukisa, khathihi na maṅwalo a u fhodza vho kwashekanaho," vha amba. Ndivho yawe ndi u ṋea vhafumakadzi maanḓa a u ṱoḓa maanḓa avho a nga ngomu na u shandukisa vhuṱungu havho ha vha maanḓa a bveledzaho zwa khwine.
"Zwilavhelelwa zwa tshitshavha kanzhi zwi tsikeledza vhafumakadzi uri vha fhumule, vha dzule vha tshi konḓelela, na u ḓiṋekedza nga murahu ha u tshenzhela u vhaisala. Bugu yanga i itela khaedu maitele aya nga u ṱuṱuwedza vhafumakadzi uri vha ṱanganedze vhuṱungu havho, vha bvisele khagala maḓipfele avho, na u livhisa ṱhogomelo kha u fhodza. Ndi fulufhela uri i rumela mulaedza wa u ṋea maanḓa, u humbudza vhafumakadzi uri vha na maanḓa a u shandukisa mbonzhe dzavho dza vha zwisima zwa maanḓa," vha engedza.
Iṅwe tsumbo i bvaho kha bugu yawe ndi nganea yawe ya u shandula vhuṱungu ha vha gundo. "Nga murahu ha u xelelwa nga murwa wanga, ndo vha ndi tshi nga tendela vhuṱungu vhu tshi nkunda, fhedzi nṱhani hazwo, ndo vhu livhisa kha mushumo wanga na u ṅwala bungu. Tshenzhemo iyi yo nthusa uri vhuṱungu vhu nga vha tshiṱuṱuwedzi tsha nyaluwo, vhukoni ha u sika, na u konḓelela," vha amba hafhu.
"Nga u kovhelana nganea yanga ya muthu nga eṱhe opfaho vhutungu na u ṋetshedza maṅwalo a u fhodza a shumaho, ndi khou sedza kha u ṋea vhafumakadzi maanḓa a u dzhia vhuṋe ha lwendo lwavho lwa u fhodza na u ṱoḓa maanḓa avho a nga ngomu," vho engedza nga u ralo.